Қазақстанға көптен күткен салқындық келеді, бірақ барлық жерде емес

"Қазгидромет" синоптиктері 14, 15 және 16 шілдеге арналған ауа райы болжамын ұсынды, деп хабарлайды Tengrinews.kz.

Синоптиктердің мәліметінше, алдағы күндері Қазақстанның солтүстік өңірлерінде ыстық сәл де болса басылады, ал елдің оңтүстігі мен шығысында өте жоғары температура сақталады.

Ұзаққа созылған ыстықтан кейін солтүстік өңірлерге солтүстік-батыс циклон және соған байланысты атмосфералық фронттар әсер ете бастайды. 15-16 шілдеде мұнда жаңбыр жауып, найзағай ойнайды, кей жерлерде нөсер жауын күтіледі, бұршақ жауып, дауылды жел тұруы мүмкін.

Сонымен қатар ауа температурасы айтарлықтай төмендейді. Күндіз синоптиктер 25-30 градус жылы болады деп болжайды.

Ал оңтүстік және шығыс өңірлер Өзбекстан аумағынан келетін құрғақ ауа массаларының ықпалында қалады. Күндізгі уақытта термометр бағандары елдің оңтүстігінде 40-45 градус аптапты, шығысында 33-38 градус ыстықты көрсетеді.

Google News арқылы жаңалықтарымызды қадағалаңыз