ҚазАвтоЖол жол бойындағы сервисті дамыту жоспарымен бөлісті

Сурет: ҚазАвтоЖол

«ҚазАвтоЖол» ұлттық компаниясы республикалық маңызы бар автомобиль жолдарындағы заманауи, қауіпсіз және жол бойындағы тұрақты қызмет желісін дамытуға арналған жаңа тәсілдерді таныстырды. Кездесу барысында компания басшылығы мен бизнес-қауымдастық өкілдері саланың қазіргі жағдайын, 2026 жылға арналған жоспарларды және сервистік инфрақұрылымды дамытудың өзекті модельдерін талқылады. 

Бүгінде ұлттық оператор ұзындығы 25 мың шақырымды құрайтын республикалық маңыздағы автомобиль жолдары желісін басқарады. Олардың бойында 1 406 жол бойы қызмет көрсету нысаны орналасқан, оның 1 306-сы немесе 93%-ы ұлттық стандарт талаптарына сай келеді. 2025 жылы 63 жаңа нысан ашылды, оның ішінде 33 сервис нысаны және 30 санитарлық-гигиеналық тораптармен жабдықталған модульдік павильондар.

Қазіргі уақытта 33 жол бойы сервис нысаны пайдалануға берілген. Олардың қатарында 17 автожанармай құю станциясы, 10 тамақтану пункті мен кафе, сондай-ақ 4 кешен және кемпинг бар. Бұл қызмет көрсету нысандары Ақмола, Ақтөбе, Алматы, Атырау, Шығыс Қазақстан, Жамбыл, Жетісу, Батыс Қазақстан, Қостанай, Қызылорда, Павлодар, Солтүстік Қазақстан және Түркістан облыстарында қызмет көрсетуде. 

Сонымен қатар модульдік санитарлық-гигиеналық тораптарды орнату жұмыстары жүргізілуде: қазіргі таңда 30 павильон орнатылып, оның 13-і жұмыс істеп тұр, қалғандары бойынша іске қосу жұмыстары жүргізілуде.

Жиналыс барысында жол бойындағы сервисті дамытудың үш нұсқасы талқыланды: 

Бірінші нұсқа қолданыстағы демалыс алаңдарын модернизациялауға бизнес өкілдерін тартуды қарастырады. Бұл – ақылы тұрақ жүйесін енгізу мүмкіндігі және санитарлық тораптар, душ, дүкендер, тамақтану орындары сияқты базалық қызметтерді міндетті түрде қамтамасыз етуді қамтиды. Екінші нұсқа 2025 жылы жөндеу жұмыстары жоспарланған жол учаскелерінде жаңа демалыс алаңдарын орналастыру. Компания асфальтбетон жабыны және электр қуатымен қамтамасыз етілген алаңдарды дайындап, инвесторларға сервис нысандарын салу үшін олардың орнын таңдауға мүмкіндік беруге дайын. Үшінші, ең ауқымды нұсқа, барлық қажетті инженерлік желілер жүргізілген және функционалды аймақтарға бөлінген көпфункционалды сервистік аймақтар құруды қамтиды. Мұнда бір аумақта тұрақ, жанармай құю станциялары, кафе, қонақ үйлер секілді барлық қызмет түрін ұйымдастыру жоспарлануда.

«ҚазАвтоЖол» ҰК» АҚ Басқарма төрағасы Дархан Иманашев жобаны іске асырудағы мемлекеттік және жеке сектор әріптестігінің маңыздылығын атап өтті: 

«Жол бойындағы сервисті дамыту – қауіпсіздікке, жайлылыққа және өңірлердің экономикалық әлеуетіне тікелей әсер ететін стратегиялық міндет. Біз инфрақұрылымды дамытудың жүйелі моделіне көшуді ұсынамыз және инвесторлармен ашық диалог жүргізуге дайынбыз. Бірлескен еңбектің арқасында еліміздің жолдарында сапалы әрі қолжетімді сервистің жаңа стандартын қалыптастырамыз деп сенемін», – деді ол.

Компания жол бойындағы сервисті жаңғырту жобасын өңірлік экономиканың өсуіне, жергілікті бизнестің дамуына және жаңа жұмыс орындарының ашылуына ықпал ететін ұзақ мерзімді бастама ретінде қарастырады. Компания кәсіпкерлермен конструктивті ынтымақтастыққа дайын екенін білдіріп, сервистік инфрақұрылым нысандарын бірлесіп жоспарлау және іске асыру бойынша ұсыныстарын әзірледі.

Кездесу соңында компания өкілдері қатысушыларды сервистік аймақтарды дамытуға арналған бірыңғай тұжырымдама қалыптастыру бойынша одан әрі талқылауға шақырды.

Бүгін, 15:22