ҚазМұнайГаз Гран кен орнында сейсмикалық барлауда инновациялық жүйені енгізді

ҚазМұнайГаз еншілес ұйымы — «Ембімұнайгаз» АҚ Атырау облысындағы «Гран» кен орнында STRYDE деректерді тіркейтін инновациялық сымсыз жүйесін қолдана бастады. 

Бұл жүйе 150 грамм салмағы бар автономды қабылдағыштардан тұрады, экстремалды температураға төтеп бере алады және 28 тәулік бойы қуатсыз жұмыс істей отырып, деректерді үздіксіз тіркейді. Деректерді жан-жақты талдау үшін тек 4 сағат қажет, бұл сейсмикалық барлауды жылдам әрі тиімді жүргізуге мүмкіндік береді.

Бір маман 90 қабылдағышты орналастыра алады, бұл қызметкерлер санын 50%-ға дейін азайтып, өнімділікті 4 есе арттырады. Дала жабдығының салмағы 20 есе, ал техниканың тартылуы 80%-ға азаяды, жұмыс уақыты орта есеппен 30%-ға қысқарады. Сонымен қатар, жүйе кабельдік инфрақұрылым мен ауыр техника қолдануды қажет етпейді, бұл шығындарды азайтып, экология мен өндірістік қауіпсіздікті арттырады.

Жобада С.Өтебаев атындағы Атырау мұнай-газ университетінің жас мамандары жұмылдырылған, бұл Қазақстандық кадрларды дамытуға және ғылыми-практикалық базаны нығайтуға септігін тигізеді.

Қазіргі заманғы сейсмикалық деректер ескі кен орындарын жаңаша бағалауға және олардың өнімділік циклін ұзартуға мүмкіндік береді. ҚазМұнайГаз «Гран» жобасын инновацияларды одан әрі енгізудің және ғылым мен технологияның синергиясын көрсету үлгісі ретінде қарастырады.

Жоба «Самұрық-Қазына» АҚ жанындағы «Самғау» ғылыми-технологиялық бастамалар орталығы, С.Өтебаев атындағы Атырау мұнай-газ университеті және британдық STRYDE технологиясының ресми өкілі — «Samga Petroleum» ЖШС-пен бірлесе жүзеге асырылуда.

Бүгін, 13:50