ҚазМұнайГаз отандық өндірушілерді қолдауды күшейтеді

«ҚазМұнайГаз» мұнай-газ өндіру саласындағы отандық өндірушілерді қолдауды күшейтеді.

Ұлттық компания Жергілікті қамтуды және ел ішінде тауарларды локализациялау деңгейін арттыруға ерекше мән беруде. Мәселен, 2025 жылдың бірінші жартыжылдығында «ҚазМұнайГаз»-дың сатып алуларындағы ішкі  үлес 851 млрд теңгеге жетті. Бұл жалпы көрсеткіштің 75%-ы.

851 млрд теңгенің 83%-і «ҚазМұнайГаз»-ға көрсетілген жұмыстар мен қызметтерге, қалғаны тауарлар бойынша төленген. Ұлттық компания барлық сатып алулар бойынша 790 млрд теңгені отандық кәсіпорындарға ұсынды. Бұл қаржының 40%-і Маңғыстауға тиесілі. Нәтижесінде өңірде 1300-ден астам жұмыс орны құрылды.

Асхат Хасенов, «ҚазМұнайГаз» ҰК АҚ басқарма төрағасы:

- 2019 жылдан бастап санайтын болсақ, 400-ден астам келісімшарқа қол қойдық. Оларға біз қандай міндеттемелерді жүктейміз? Яғни ұзақ мерзімді келісімшартты бере отыра жоғары күрделі технологияларды игеру, локализацияны тереңдету және жаңа жұмыс орындарын құру. Отандық өндірушілеріміз өзінің сертификаттарын, тауарды шығара алатынын дәлелдейтін болса, бізде рәсімдер өте тез, жеңіл жүреді.

Мұнай-газ және машина жасау саласын дамытуға бағытталған форумда бірқатар меморандумға қол қойылды. Айталық, «KMG Petrochem» серіктестігінің IMB қауымдастығына қосылуы туралы ресми келісім жасалды. «ҚазМұнайГаз»-ға еншілес ұйым 2,8 млрд доллар инвестиция құйылған газ-сепарациялық кешен, магистралды құбыр өндіру секілді жобалармен айналысады.

Диаз Диянов, «КMG Petrochem» ЖШС басқарма төрағасы:

- IMB қауымдастығы арқылы біз жергілікті қамту көрсеткішін дамытуға үлес қосамыз. Яғни өндіріске қажетті материалдар, құрал-жабдықтар тек отандық кәсіпорындардан сатып алынады.

Ұлттық компания отандық өндірушілерге офтейк-келісімшарт тетігі арқылы да қолдау көрсетеді. Биыл жалпы сомасы 16 млрд теңге болатын 109 меморандум жасалса, 2019 жылдан бері 78 млрд теңгеге 466 келісімшартқа қол қойылды. Жергілікті қамтуды дамыту бойынша жүйелі жұмыс нәтижесінде Жаңаөзенде мұнай-газ жабдықтарын өндіретін зауыт салынды. Жобаға 17 млрд теңге инвестиция жұмсалды.

Авторлары: Талғат Исламұлы, Ренат Досалиев