Қонаевта жылына 13 млн литр сүт өндіретін ферма салынады

АЛМАТЫ, 5 қаңтар – Sputnik. Қонаев қаласына қарасты Шеңгелді ауылдық округінің аумағында 1200 басқа арналған сүт-тауар фермасы бой көтереді, деп хабарлайды қала әкімдігінің баспасөз қызметі.

Құрылыс жұмыстарын бастауға 1955 гектар жер телімі бөлінді. Қазіргі таңда оның 700 гектарына мал азығы дақылдарын егу үшін жер дайындалып жатыр. Мұнда тамшылатып және жаңбырлатып суару технологиясы қолданылмақ.

"Инвестжоба 2030 жылға дейін жүзеге асады деп жоспарланып отыр. Тартылатын инвестиция көлемі – 15 млрд теңгеден астам. Жоба жүзеге асса, 100 жаңа жұмыс орны құрылады. Ферманың жылдық қуаттылығы 13 млн литр сүт өндіруге жеткілікті болмақ", - дейді баспасөз қызметі.

Жоба аясында екі негізгі технологиялық үдеріс көзделген. Бірінші үдеріс мал азығы дақылдарын өсіру болса, екіншісі – тауарлы сүт өндіру.

Қонаев қаласының әкімі Асхат Бердіханов ивестжобаны халыққа таныстыру үшін жиын өткізді.

"Зауыт салынуын жан-жақты қолдауымыз қажет. Кәсіпорынның бой көтеруі ауылдағы жұртшылықтың әл-ауқатына, қала экономикасына тікелей әсер етеді. Алдағы уақытта қалада 40-тан астам инвестжоба жүзеге асырылмақ", – деді шаһар басшысы.

Айта кетері, былтыр Қонаев қаласына 100 млрд теңгеден астам инвестиция тартылды.