Қостанайда бір аптада мас күйінде көлік жүргізген 49 адам ұсталды

Қостанай облысында соңғы екі күннің ішінде 3061 әкімшілік құқық бұзушылық тіркелді. Полиция 2 мыңнан астам жол ережесін бұзу дерегін анықтап отыр, деп хабарлайды Egemen.kz.

Облыстық ПД баспасөз қызметінің мәліметінше, өткен сенбі-жексенбі күндері жол сақшылары мас күйінде көлік жүргізген 18 адамды ұстаған. Мысалы, 16 қарашада Қостанай ауданында «FAW» маркалы көлікті мас күйінде жүргізіп келе жатқан 23 жастағы аудан тұрғыны ұсталған. Оның бұған дейін де көлік жүргізу құқығынан айырылғаны анықталды. Аталған азаматқа қатысты екі бірдей әкімшілік іс қозғалды.

Қарабалық ауданында да осыған ұқсас дерек тіркелді. Аталған ауданда 37 жастағы тұрғын ВАЗ-21099 автокөлігін мас күйінде жүргізгені үшін ұсталды. Ол 15 тәулікке дейін әкімшілік қамауға алынып, 7 жылға жүргізуші куәлігінен айырылуы мүмкін. Соңғы шешім – соттың құзырында.

«Өткен апта ішінде полиция 4810 жол қозғалысы ережесін бұзу дерегін анықтады. Сондай-ақ 49 мас жүргізуші ұсталды. Жол қозғалысын қадағалаумен қатар, тәртіп сақшылары қоғамдық қауіпсіздік бағытында да белсенді жұмыс жүргізді. Мәселен, апта ішінде 583 адам медициналық айықтырғышқа жеткізілді», дейді облыстық ПД баспасөз хатшысы Карина Базарбаева.

Полиция мәліметінше, қоғамдық тәртіпті қадағалау барысында  бейнебақылау камераларының көмегі көп.  Мысалы, 1263 құқық бұзушылық қала ішіндегі, жол бойындағы камералар арқылы анықталған.

Қостанай облысы