Құқықтық дәріхана : СҚО да тұрғындарға тегін құқықтық көмек берген ерекше акция өтті

«Құқықтық дәріхана» деп аталған акцияның өтетіні туралы алдын ала хабарландыру берілді. Сондықтан да болар, заңгерлермен кездесуге келгендердің қарасы қалың болды. Іс-шара бір уақытта Петропавлдағы ірі сауда орындарында, ойын-сауық орталықтарында және аудандарда адам көп жүретін Халыққа қызмет көрсету орталықтарында, аудандық ауруханаларда, Мәдениет үйлерінде ұйымдастырылды.

СҚО прокуратурасының мәліметінше, облыстың 250-ге жуық тұрғыны әлеуметтік қамсыздандыру, отбасы, еңбек, тұрғын үй, салық және жер заңнамасына қатысты өзекті сұрағына жауап алды.

Мәселен, акция кезінде тұрғындардың бірі жеке сот орындаушысы салған айыппұлды уақытында төлегеніне қарамастан, банк шотын бұғаттан шығармағанын айтып шағымданды. Салдарынан ол екі ай бойы еңбекақысын ала алмаған. Прокуратура қызметкерлері небәрі 15 минут ішінде шоттағы тыйымды алып тастады.

Ал қоғамдық бірлестік өкілі қылмыстық істің сапасыз тергелуіне шағым түсірді. Бұл мәселе облыс прокурорының бірінші орынбасарының жеке бақылауына алынып, жауаптыларға нақты тапсырмалар берілді.

Ұйымдастырушылардың айтуынша, бұл акция енді әр сейсенбі сайын дәстүрлі түрде өтеді. Мақсат - өңір тұрғындарына құқықтық көмекті барынша қолжетімді ету, қабылдауға алдын ала жазылусыз келіп, жедел көмек алуға жағдай жасау.

Бұған дейін алматылықтар тегін құқықтық көмек алатын жоба іске қосылатынын жазған едік.