Құжаттардан жағажайларға дейін Черногорияға сапар алдында нені ескеру керек

Черногория Еуропадағы ең жете бағаланбаған бағыттардың бірі болып қалып отыр: мұнда небәрі екі сағат ішінде Альпі шыңдарын жылы Адрия теңізіне алмастыруға болады. Бірақ сапарға шықпас бұрын құжаттар мен тіркеуден бастап, киім-кешек, көлік жәнежергілікті тұрғындардың әдет-ғұрыптарына дейінгі бірқатар практикалық мәселені ескерген жөн, деп хабарлайды Tengri Travel тілшісі Lonely Planet-ке сілтеме жасап.

Черногория Еуропадағы ең жете бағаланбаған бағыттардың бірі болып қалып отыр: мұнда небәрі екі сағат ішінде Альпі шыңдарын жылы Адрия теңізіне алмастыруға болады. Бірақ сапарға шықпас бұрын құжаттар мен тіркеуден бастап, киім-кешек, көлік жәнежергілікті тұрғындардың әдет-ғұрыптарына дейінгі бірқатар практикалық мәселені ескерген жөн, деп хабарлайды Tengri Travel тілшісі Lonely Planet-ке сілтеме жасап.

Құжаттар және елге кіру

Черногория әзірге ЕО мен Шенген аймағына кірмейді. Еуропадағы көптеген ел, сондай-ақ АҚШ, Канада, Аустралия, Жаңа Зеландия, Түркия, Сингапур, Оңтүстік Корея және Жапония азаматтарына елге кіру және болу үшін виза талап етілмейді. Бұл ереже Қазақстан азаматтарына да қолданылады.

Маңызды жайтты бөлек ескеру қажет: Қазақстан азаматтары Черногорияға визасыз тек 2026 жылдың мамыры мен қазаны аралығында бара алады.

Черногорияда қатаң талап бар - барлық шетелдік келгеннен кейін бір тәулік ішінде, сондай-ақ тұрғылықты мекенжайын ауыстырған сайын жергілікті полицияда тіркелуге міндетті.

"Қонақ үйлер мен пәтерлерді қысқа мерзімге жалға беретін агенттіктердің көбі мұны өздері істеп береді, бірақ бұл әрдайым емес (егер сіз досыңыздың үйіне тоқтасаңыз, ешкім сізді автоматты түрде тіркемейтіні анық). Шекарашылар елден шығар кезде тіркеу туралы растаманы талап етуі мүмкін, сондықтан бұл елемеуге болмайтын маңызды рәсім", - деп ескертті Lonely Planet сарапшылары.

Фото: depositphotos.com

Ауа райы

Чемоданыңызды жинағанда тек жағажай киімдерімен шектелмеңіз. Черногорияда сәуір мен қыркүйек аралығы ылғалды маусым саналады. Сонымен қатар дәл осы жерде Еуропадағы ең жаңбырлы елді мекен Црквице орналасқан. Ел астанасы Подгорица да жыл сайын 1600 мм-ден астам жауын-шашын түсетін ең "ылғалды" еуропалық астана мәртебесін иеленіп отыр. Сондықтан жаңбыр өткізбейтін киім мен аяқ киім - заттар тізіміндегі must-have.

Жоспарлау ерекшеліктері

Егер сіз жазғы демалысты жоспарласаңыз, тұрғын үйді алдын ала брондауыңыз керек. Будва мен Свети-Стефан сияқты курорттарда, сондай-ақ Старый Бар (мұнда тұрғын үй таңдауы аз) сияқты колоритті жерлерде жаз айларында туристер легі өте көп болады.

Маршрутты жоспарлау кезінде тағы үш маңызды жайтты ескеріңіз:

1. Круиздік лайнерлер кестесі

Котор мен Будва сияқты інжу-маржандарды міндетті түрде көру керек. Дегенмен, барар алдында круиздік кемелердің келу кестесін тексеріп алыңыз. Портта алып лайнерлер тұрған күндері туристердің көптігі көне көшелердің тыныш атмосферасына кедергі келтіруі мүмкін.

2. Құмды қайдан іздеу керек?

Балқанның Адрия жағалауы мөлдір таза суымен ерекшеленеді, бірақ құмды жағажайлар мұнда сирек кездеседі - негізінен жағалау малтатасты болып келеді. Дегенмен, Черногорияда екі ерекше жер бар. Елдің оңтүстік-шығысында, Албаниямен шекарада Велика-Плажа (Ұлы жағажай) орналасқан - бұл күңгірт құмды, ұзындығы 12 шақырымдық әсерлі жағалау. Ал Бояна өзенінің арғы жағында Ада-Бояна аралының үш шақырымдық құмды жағажайы басталады.

3. Жабық Свети-Стефан

Құрлықпен тар мойнақ арқылы жалғасқан әйгілі арал-қамал созылып кеткен халықаралық арбитражға байланысты әлі де көпшілік үшін жабық. Оның қабырғасының ішіне тек сонда орналасқан люкс курорт қонақтары кіре алады. Соған қарамастан, тас жолдан және материктік жағажайлардан керемет панорамалық суреттер түсіру үшін мұнда келуге әбден болады.

Фото: depositphotos.com

Аспаздық дәстүр мен жергілікті әдеп

Черногория өзінің ракиясымен (жеміс-жидектен жасалған күшті бренди) танымал. Әдептіліктің басты ережесі - ешқашан алкогольді өзіңізге құймаңыз. Бокалыңызды толтыру құқығын үй иесіне немесе дастархандас серігіңізге қалдырыңыз. Сарапшылар Морача шіркеуіне жақын жерде шағын партиямен шығарылатын сирек кездесетін Arambaša қара өрік ракиясын іздеп көруге кеңес береді.

Классикалық балқан асханасынан бөлек чевапи (грильдегі шұжықтар), бурек (қабатталған бәліш) және блитвамен (мангольд пен картоптан жасалған гарнир) ұсынылатын балғын балықтан басқа - Негуш пршутын (кептірілген ет) сол аймақтың қатты қой ірімшігімен және жергілікті Вранац қызыл шарабымен (мысалы, Plantaže Vranac Pro Corde) бірге татып көріңіз.

Ресми түрде Черногория 2019 жылдың өзінде жабық қоғамдық орындарда (казинолардан басқа) темекі шегуге тыйым салған. Бірақ іс жүзінде көптеген дәмхана мен барлар бұған көз жұма қарайды, тіпті күлсалғыштар қойып, құптайды. Егер темекі түтіні сізге кедергі келтірсе, қызметкерлерге шағымдануға немесе басқа орынды таңдауға толық құқығыңыз бар.

Жергілікті мешіттер мен храмдарда туристерді жылы қарсы алады, бірақ ережелерді сақтау маңызды. Киім кең әрі денені жауып тұруы тиіс (шолақ шалбар, майка, қысқа белдемше және тар джинсы киюге болмайды). Кіреберісте аяқ киімді шешіп, телефонды өшіру керек. Әйелдерге басын жабу міндетті емес, бірақ бұл үлкен құрметтің белгісі ретінде қабылданады. Сондай-ақ ұжымдық құлшылық кезінде мешіттер мен храмдарға барудан аулақ болған жөн.

Фото: depositphotos.com

Байланыс, көлік және ақша

Ресми тілі - черногор тілі. Google Translate жүйесінде бұл тіл жоқ, бірақ аударма үшін хорват (латын әліпбиінде) немесе серб (кириллицада) тілдері өте қолайлы - бұлардың бәрі серб-хорват тілдік кеңістігінің бір-біріне ұқсас нұсқалары. Навигацияда көбіне нұсқаулықтар мен мәзірді түсінуге көмектеседі.

Жергілікті операторлар (мысалы, Telekom және m:tel) туристерге алдын ала төленген eSIM пакеттерін ұсынады. 15 еуродан (шамамен 8500 теңге) басталатын сомаға 500 ГБ-тан 1 ТБ-ға дейінгі интернет-трафигі бар туристік картаны алуға болады.

Черногорияның танымал қорықтарына (Скадар көлі, Дурмитор, Ловчен, Проклетие, Биоградская гора) кіру ақысы еуропалық стандарттар бойынша өте арзан - 3-тен 5 еуроға дейін (шамамен 1500-ден 3000 теңгеге дейін). Егер кем дегенде үшеуіне баруды жоспарласаңыз, елдегі барлық ұлттық паркке жарамды 13,50 еуролық (шамамен 7500 теңге) бір жылдық бірыңғай билетті бірден сатып алған тиімдірек.

Фото: depositphotos.com

Черногорияда көлік жүргізу үшін төзімділік пен барынша зейін қою қажет - жергілікті тұрғындардың жүргізу мәнері, әсіресе басып озу кезінде, өте агрессивті болуы мүмкін.

Жолдарда мобильді патрульдер мен радар көп. Егер сіз жылдамдық режимін бұзбасаңыз және құжаттарыңыз дұрыс болса, ешқандай қиындық туындамайды. Дегенмен, өңірде жол полициясы арасындағы ішінара жемқорлық туралы қауесеттер әлі де бар, сондықтан тоқтатуға себеп бермеген абзал.

15 қараша мен 1 сәуір аралығында елдің көптеген жолында қысқы дөңгелектерді пайдалану міндетті. Көлік жалдайтын компаниялар, әдетте, дайын машиналарды береді, бірақ мұны тексерген жөн: дөңгелектер маусымға сәйкес келмегені үшін айыппұл көлемі 50-ден 150 еуроға дейін (шамамен 27-ден 84 мың теңгеге дейін) жетеді.

Ірі қалаларда (Подгорица, Будва, Херцег-Нови) паркоматтар стандартты әрі түсінікті. Ал Жабляк (Дурмитор паркінің басты қақпасы) сияқты шағын қалашықтарда төлем көбінесе SMS арқылы жасалады, бұл шетелдік сим-карталар үшін қолжетімсіз. Балама ретінде - дүңгіршектен қағаз талон сатып алып, оны алдыңғы әйнектің астына қою керек. Мұндай дүңгіршекті табу оңай емес, сондықтан сарапшылар жергілікті тұрғындардан көмек сұрауға кеңес береді.

Мінсіз чемодан: демалысқа не алу керек және не жиі ұмытылып қалады?

Тағы оқыңыз: Аптап және қызыл деңгей: Еуропада ауа температурасы 44 градусқа көтерілді

Google News арқылы жаңалықтарымызды қадағалаңыз

Жазылу