Қырғызстанда орта кәсіпорындар азайып, жеке кәсіпкерлер саны көбейді

Бұл туралы Ұлттық статистика комитетінің қаржы және баға статистикасы басқармасының басшысы Малика Абдукадирова Бішкекте өткен баспасөз конференциясында мәлімдеді.

Оның айтуынша, 2024 жылы республика аумағында 24,6 мың шағын кәсіпорын және 905 орта кәсіпорын жұмыс істеген. Шаруа (фермерлік) қожалықтарының саны 475 мыңды құрады. 2023 жылмен салыстырғанда, орта кәсіпорындар мен шаруа (фермерлік) қожалықтар санының аздап қысқарғаны байқалады.

— Шағын және орта кәсіпорындардың ең көбі Бішкек қаласында тіркелген — 18,6 мың кәсіпорын немесе олардың жалпы санының шамамен 73 пайызы. Нарын облысында олардың саны — 337, бұл республикадағы шағын және орта кәсіпорындардың 1,3 пайызына тең. Ош облысында 89 мыңға жуық жеке кәсіпкер тіркелген — бұл олардың жалпы санының 18 пайызынан астамы. Ал ең аз көрсеткіш Талас облысында — шамамен 16 мың. Бішкек қаласында 71 мыңнан астам жеке кәсіпкер тіркелген, — деді ол.

Абдукадированың айтуынша, шаруа қожалықтарының ең көп бөлігі Ош облысында шоғырланған — 138 мыңға жуық. Бұл көрсеткішке ауыл шаруашылығымен айналысатын жеке кәсіпкерлер де кіреді. Шағын және орта кәсіпкерлік субъектілерінің жалпы санының ішінде (шаруа қожалықтарын есепке алмағанда) 39 пайызы сауда саласында, 25 пайызы ауыл шаруашылығы мен балық шаруашылығында, 10 пайызы көлік саласында, ал 6 пайызы өнеркәсіпте жұмыс істейді.

— Жалпы алғанда, 2024 жылы шағын және орта кәсіпкерлік субъектілерінің қызметі оң динамикамен сипатталды. Жыл қорытындысы бойынша жалпы қосылған құн көлемі 664,6 миллиард сомды құрап, ЖІӨ-нің 43,6 пайызына тең болды. Ең үлкен үлес жеке кәсіпкерлерге тиесілі — 282 миллиард сомнан астам немесе 18,5 пайыз, — деді маман.

Бұдан бұрын хабарланғандай, Қырғызстанда бірыңғай төлқұжат енгізіледі: енді кез келген құрылыс нысанын QR код арқылы тексеруге болады.