Қытай әлем бойынша атом энергетикасындағы ең ірі операторға айналады

Қытай алдағы 5 жылда атом энергетикасы саласында әлемдегі ең ірі операторға айналады.

Көрші мемлекеттің үкіметі АЭС санын арттыруға күш салып жатыр. Осының арқасында табиғи ресурстарды үнемдеп тұрақты энергияға қол жеткізуді көздейді. Дәл қазіргі уақытта ел аумағында 44 ядролық реактордың құрылысы қатар жүргізілуде. Ал оларды жасанды интеллекті арқылы басқарады. 

Руслан Бақытбекұлы, тілші:

- Қытайда атом электр станциялары жасанды интеллекті арқылы басқарылады. Елдің ядролық энергетика жөніндегі бас корпорациясы цифрлық жүйені жасап шетінен енгізіп жатыр. Осының негізінде АЭС-тердің жұмысын оңтайландыруға кіріскен.

Қазір елде 58 ядролық реактор болса соның 20-дан астамы осы тәсілмен жұмыс істейді. Сандық жүйе жаңа технологиямен интеграцияланған. Мамандардың айтуынша, бұл стратегиялық нысандарды қауіпсіз басқарып, сапалы мониторинг жүргізуге мүмкіндік береді.

Сунь Юнбинь, Қытайдың ядролық энергетика жөніндегі корпорациясының басқарма төрағасы:

- Бұл цифрлық жүйе атом электр станциялары үшін суперинтеллектуалды ми тәрізді. Біздегі бағдарламалау, микросхема, операциялық жүйе ішкі өндірісті арттыруға жол ашады. Бұл ақауларды алдын ала анықтап қандай да бір шешім қабылдау кезінде тиімділігі жоғары. Сондай-ақ операторларға интеллектуалды қолдау болып отыр.

Қытайлар атом электр станцияларының санын жылдан жылға көбейтіп жатыр. Жуырда тағы бір АЭС-тің құрылысын бастады. Алты реактордан тұратын нысанның іргетасы Шандунь провинциясында қаланды. Жылдық қуаты 50 млрд киловатт сағат.

Вэй Цзиньсо, «Чжаоюань» АЭС-нің жоба жетекшісі:

- Бұл Қытайдағы салқындатқыш мұнарасы бар алғашқы атом электр станциясы болады. Қуаты 7,2 миллион киловаттық бірінші реактордың құрылысы басталды. Бірінші кезеңі аяқталғаннан кейін тұрғын үй және өнеркәсіп үшін шамамен 5 миллион адамның жылдық қажеттілігін қанағаттандыруға мүмкіндік береді.

Руслан Бақытбекұлы, тілші:

- Елдің ұлттық энергетикалық басқармасының мәліметіне сәйкес, Қытайда ядролық энергия көздерінен жылына жалпы мөлшері 450 млрд кВт сағат энергия өндіреледі. Осының арқасында 140 миллион тонна көмір үнемделген. Ал ауаға бөлінетін көмір қышқыл газы 370 миллион тоннаға қысқарған деген дерек бар. Енді Қытай 2030 жылға қарай АЭС-тердің жалпы қуатын 113 гигаваттқа жеткізуді көздеп отыр. 

Руслан Бақытбекұлы, Мадияр Ерсайын