Қытай мемлекеті қолдайды деп болжанған қаскөйлер тобы ЖИ құралын қолданып, 30 ұйымға жасырын кіріп, мәліметтер жинаған

Aikyn.kz кибершабуылдың қалай іске асырылғанын gizmodo.com сайтының материалына сүйеніп талдайды.

«Бұл – алғаш рет адамның өте аз араласуымен жүзеге асқан ауқымды кибершабуылдың құжатталған оқиғасы деп санаймыз», – деп мәлімдеді Anthropic компаниясы осы айдың басында.

Осы шабуылға байланысты Конгрестің Өкілдер палатасының Ішкі қауіпсіздік комитеті Anthropic компаниясының бас директоры Дарио Амодейге 17 желтоқсанда Конгресс тыңдауында жауап беруі үшін ресми хат жолдаған. Тыңдау Қытаймен байланысы бар тұлғалардың Anthropic шығарған Claude ЖИ жүйесін пайдаланып жасаған ықтимал кибершабуылына байланысты өтпек.

Комитет төрағасы, Нью-Йорк штатынан сайланған республикалық Эндрю Гарбарино Амодейге, сондай-ақ Google Cloud бас директоры Томас Курианға және Quantum Xchange басшысы Эдди Зервигонға келесі айдағы тыңдауға қатысу туралы шақыру жіберген. Егер Амодей келіссе, бұл – Anthropic басшысының Конгресс комитеті алдында алғаш рет жауап беруі болмақ.

Anthropic компаниясы 13 қарашада жариялаған есебінде қыркүйек айының ортасында күдікті белсенділікті анықтаған. Ішкі тексеру нәтижесінде «жоғары деңгейлі тыңшылық кампаниясы» жүргізілгенін мәлімдеген. Компанияның айтуынша, қаскөйлер жасанды интеллект Claude-тің мүмкіндіктерін бұрын-соңды болмаған деңгейде пайдаланып шабуылдар жасаған.

Зерттеу нәтижесі «Қытай мемлекеті қолдайтын» топ деп болжанған қаскөйлер Claude Code құралын қолданып, әлемнің 30 ұйымына шабуыл ұйымдастырғанын көрсеткен. Шабуыл нысанасына ірі технологиялық компаниялар, қаржы институттары, химиялық өндіріс кәсіпорындары мен мемлекеттік органдар іліккен. Компания бұны адамның қатысуы өте аз болған ауқымды кибершабуылдың алғаш тіркелген жағдайы деп отыр.

Anthropic бұл жайтты соңғы айларда жиілеген «vibe-hacking» (вайб-хаккинг) құбылысының ушығуы деп атады. «Vibe-кодинг» термині де соңғы жылда кеңінен таралып, бағдарламалау тәжірибесі жоқ адамдардың генеративті ЖИ құралдарын пайдаланып код жазуы және орналастыруы сияқты әрекеттерді қамти бастады.

Терминология одан әрі кеңейіп, басқа да көптеген қолданбаларды сипаттайтын болды. Ең белгілі мысалдардың бірі – Uber негізін қалаушы Трэвис Каланиктің All-In подкастінде өзін «vibe-физикамен» айналысамын деп жариялап, үлкен тілдік модельдер «әлемнің жаңа заңдарын» аша алмайды деп мәлімдеуі.

Ал Anthropic неге АҚШ-қа қарсы ЖИ арқылы кибершабуыл жүргізуге мүмкіндік беретін құралдар жасайды? Компания 13-ші қарашадағы өз есебінде бұл сұраққа жауап беріп, Claude жүйесінің киберқауіпсіздікте маңызды рөл атқаратынын түсіндірді.

Егер ЖИ технологиялары осындай шабуылдарды жасауға қолданылуы мүмкін болса, неге оларды ары қарай дамыту қажет? Себебі дәл осы мүмкіндіктер Claude жүйесін киберқорғаныс үшін де аса маңызды етеді. Күрделі кибершабуылдар болатыны түсінікті. Anthropic өкілдерінің айтуынша, Claude жүйесі киберқауіпсіздік мамандарына шабуылдарды анықтауға, олардың алдын алуға және жүйені жетілдіруге көмектеседі.

«Біз алғаш рет шетелдік қарсыластың коммерциялық ЖИ жүйесін пайдаланып, адамның минималды қатысуымен толыққанды кибероперация жүргізгенін көріп отырмыз. Бұл АҚШ-тың барлық федералдық агенттіктері мен маңызды инфрақұрылым секторларын алаңдатуға тиіс», – дейді Гарбарино журналистерге берген сұхбатында. 

Қазақ Елінің ірі қаржы институттары, өндіріс кәсіпорындары мен мемлекеттік органдар осындай шабуылдарға төтеп беруге қауқарлы ма?! Сіз қалай ойласыз?

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.