Қытай мобильді электрстанциялар енгізді

Өткен жылы әлемде сатылған көліктердің бестен бір бөлігі электрлі болған. Халықаралық энергетикалық агенттіктің дерегінше, соңғы бес жылда электромобиль нарығы күрт өзгерді. Сатылым көлемі жеті есеге артқан. 2024 жылдың көрсеткіштері әлемде 17 миллионнан астам электрокар сатылғанын айтады. 

Электромобиль сату бойынша әлемдік көшбасшы — Қытай. Бұған елдегі экономикалық ынталандыру тетіктері, соның ішінде trade-in жүйесі ықпал етіп отыр. Яғни азаматтар ескі көлігін электрокарға айырбастаса, мемлекеттен 2 мың долларға дейін субсидия ала алады. Электрокарларға сұраныс күрт артқандықтан, елде оларды қуаттайтын мобильді роботтар іске қосылды. Бұл шешім әсіресе тығыз қоныстанған аудандар үшін тиімді, себебі ондай жерлерде тұрақты қуаттау бекеттерін орнату қиын. Робот өздігінен көлік алдына келіп қызмет көрсетеді. Ол бір күнде 12 электромобильге дейін қуат бере алады. 

Германияда электркар сатылымы азайды

Қытай компаниялары өз ықпалын Еуропада да күшейтіп жатыр. Reuters агенттігінің дерегінше, 2023 жылмен салыстырғанда, еуропалық автосалондардағы шетелдік модельдер саны 40 пайызға артқан. Алайда жергілікті брендтерге Қытаймен электромобиль өндіру мен бағдарламалық қамтамасыз ету саласында бәсекелесу барған сайын қиын болып жатыр. 2023 жылы Германияда электрокар сатып алушыларға арналған субсидиялар тоқтатылғаннан кейін, сұраныс төмендеп кеткен. Енді билік қайтадан қолдау шараларын енгізуді жоспарлап отыр. Бірақ тек орта және төмен табысты азаматтар үшін. Бұл бастама экологиялық көлікке көшу мүмкіндігін бәріне қолжетімді етуді көздейді. Үкімет осы мақсатқа 3 миллиард еуро бөлуді жоспарлаған.

АҚШ-та электрмобильге сұраныс төмендеді

Бұған дейін америкалықтар электрокарларды салықтық жеңілдіктердің арқасында белсенді сатып алған. Жаңа көлік иелеріне 7,5 мың долларға дейін, ал қолданыстағы көлік алушыларға 4 мың долларға дейін несие жеңілдігі қарастырылған еді. Алайда қыркүйек айының соңында бұл шаралар жаңа заң күшіне енген соң тоқтатылды. Сарапшылардың айтуынша, енді нарықтағы сұраныс бәсеңдеуі мүмкін. Сондықтан кейбір автоөндірушілер оларды өз тарапынан берілетін жеңілдіктермен толтыруға тырысып жатыр. Қазіргі таңда электрокар нарығындағы жетекші компания — Tesla. Ол жаңа клиенттер тарту үшін базалық модельдерінің арзандатылған нұсқаларын ұсынды.