Қытайда әлемдегі ең үлкен мұз қалашығы салынып жатыр

Қытайлар әлемдегі ең үлкен мұз қалашығын салып жатыр. Шаһар 100 пайыз мұздан тұрғызылады. Осы арқылы әлем назарын аударып көп саяхатшы тартуды көздеп отыр. Туристік жоба көрші елдің солтүстік-шығысындағы Харбин қаласында жүзеге асырылуда. 

Руслан Бақытбекұлы, тілші:

- Қытайлар мұз қаланың құрылысын бастады. Аумағы 1,2 миллион шаршы метр. Мұз патшалығы қытай сәулет стилінде салынуда. Барлық элемент осы елдің мәдениеті және тарихымен ұштастырылған. Бұл туристердің қызығушылығын арттырып отыр. 

Бұл - туристерді ең көп тартатын және бюджетке қомақты қаржы әкелетін негізгі жобалардың бірі. Сондықтан қытайлар бұған қатты мән береді. Оның құрылысына 200 мың шаршы метр мұз пайдаланылады. Құрлысықа 10 мың жұмысшы және мыңнан астам техника тартылды. Сонымен қатар мүсіндерді жасауға 300-дей кәсіби мүсінші жалданды. Алайда биыл құрылысшылар  кедергілерге тап болып отыр. Мұз тапшы. Өзен, көлдердің беті қатпаған. Ал уақыт тығыз. Қаланы дер кезінде тұрғызбаса кеткен шығын ақталмайды. Туристік науқанға үлгеру үшін жанталасып жатыр. Былтырдан бері сақталған мұз кірпіштер толық жетпеді. Жуық арада күн суып, мұз қатпаса инвесторлар қыруар шығынға батып, жоба құрдымға кетуі мүмкін. 

Цун Пэйюй, мұз қалашығын дамыту және дизайн бөлімінің жетекшісі:

- Былтыр мұздарды ойып 10 ай бойы сақтадық. Қазір соларды кәдеге жаратып жатырмыз. Бірқатар мұз мүсіндер дайын. Мұзды кесуге және тасымалдауға арналған қажетті техникалар орнатылды. Алайда ауа райы қолайсыз болып тұр. Жобаның сәнін келтіретін қар мен мұз жоқ. Кемінде 10 мың шаршы метр қар керек. Өйткені биыл мұз қалашықтың аумағын үлкейтіп отырмыз. 

Мамандардың айтуынша, мол табысқа шығу үшін мұз нысан кемінде 60 күн жұмыс істеуі тиіс. Алайда бәрі ауа райына байланысты. Жуырда күн суытпаса миллиардтаған қаржы рәсуа болуы мүмкін. Сарапшылар қонақ үйлер мен алдын ала сатылған билеттерге қарап  биыл былтырғыдан да көп турист келеді деп болжап отыр.

Руслан Бақытбекұлы, тілші:

- Өткен жылы қысқы маусымда Харбинге жалпы саны 90 миллионнан астам адам келіп кеткен. Нәтижесінде 19 млрд АҚШ доллар табыс түскен. Осыншама қырауар қаржы мен табыс ауа райының қолайсыздығына қарамастан инвесторларды тәуекелге бел бууға итермелейді. Қалай болғанда да Харбиннің суық климаты мен әлеуеті туризм бағытында ұтымды пайдаланылып отыр. 

Авторлары: Руслан Бақытбекұлы, Мадияр Ерсайын