Қытайдың алғашқы аймағы іштен жанатын қозғалтқышы бар автомобильдерді сатуға толық тыйым салады

Қытайдың Хайнань провинциясы елде алғашқы болып іштен жанатын қозғалтқышы бар жаңа автокөліктерді сатуға толық тыйым салмақ. Шектеу 2030 жылға қарай күшіне енуі тиіс, деп хабарлайды Tengri Auto тілшісі carnewschina-ға сілтеме жасап.

Тиісті шешім Хайнань ұлттық экологиялық пилоттық аймағын дамытудың жаңа 15-ші бесжылдық жоспарында бекітілген - аралдық провинция экологиялық таза көлікке толық көшу бойынша пилоттық аймаққа айналады.

Хайнань шамамен 35,4 мың шаршы шақырым аумақты алып жатыр. Билік пікірінше, өңірдің мұндай шағын өлшемі мен ұзындығы 612,8 шақырым болатын айналмалы автокөлік жолы электрмобильдерді жаппай пайдалануға өте қолайлы.

Бұған барлық алғышарт бар: 2026 жылдың ортасына қарай жаңартылатын энергия көздері аралдағы электр энергиясының негізгі көзіне айналды, ал Хайнань жаңа сатылымдар арасында электрмобильдер үлесі бойынша Қытайда бірінші орынды, ал жаңа энергия көздерімен жүретін автокөліктердің жалпы саны бойынша екінші орынды иеленеді.

2030 жылға қарай қандай мақсаттар қойылды?

2030 жылға қарай билік:

мемлекеттік, коммуналдық және қоғамдық автопаркті толығымен экологиялық таза көлікке көшіруді; жаңадан алынатын және ауыстырылатын жеке автокөліктер ішінен тек жаңа энергия көздерімен жүретін көліктерді тіркеуге рұқсат беруді (мамандандырылған техниканы қоспағанда); жалпы автопарктегі электрмобильдер мен жаңа энергия көздерімен жүретін басқа да көліктердің үлесін 45 пайыздан асыруды; қуаттау инфрақұрылымымен қамтамасыз ету деңгейін бір қуаттау бекетіне 2,5 автокөліктен аспайтын мөлшерде сақтауды жоспарлап отыр. Қандай мәселелерді шешу қажет?

Басты міндеттердің бірі - қуаттау және сутегі инфрақұрылымын дамыту, сондай-ақ қолданыстағы энергия жүйесін жаңғырту. Мәселе мынада: аралда орналасуына байланысты Хайнань ұзақ уақыт бойы сырттан келетін электр энергиясына тәуелді болып, бұл жоғары шығынға әкеп соқтырды.

Бұл мәселені шешу үшін билік атом және жаңартылатын энергетиканы дамыту есебінен меншікті энергия тәуелсіздігі деңгейін 2025 жылғы 24 пайыздан 2030 жылға қарай 54 пайызға дейін арттыруға ниетті.

Сонымен қатар электрмобиль иелері үшін тіркеу кезіндегі жеңілдіктерді сақтау, сондай-ақ көлікті пайдалану мен тұраққа қою кезінде қосымша артықшылықтар беру жоспарланған.

Ауқымды жоспарға қарамастан, Хайнань Қытайдың шағын өңірлерінің бірі болып қала береді. Бір қызығы, мұнда Hainan Mazda кәсіпорнын қоспағанда, автокөлік өнеркәсібі жоқтың қасы.

Тағы оқыңыз: Қытай көліктерге қатысты жаңа талап енгізбек: не өзгеруі мүмкін?

Шымбұлаққа көлікпен кіруге қайтадан тыйым салынбақ: жоба жарияланды

Google News арқылы жаңалықтарымызды қадағалаңыз

Жазылу