Қызмет кезінде Тиктокта тікелей эфирде отырған: Маңғыстауда шекарашыға сот үкімі шықты

АСТАНА, 12 қаңтар - Sputnik. Маңғыстау облысы Бейнеу ауданында шекарашы әскери қызмет кезінде тик-токта тікелей эфирде отырған, деп хабарлайды Маңғыстау облыстық соты.

Шекарашының мәселесі Бейнеу аудандық сотында қаралды. Оған әкімшілік құқық бұзушылық туралы Кодекстің 652-бабының 6-бөлігімен іс қозғалды.

"Шекара басқармасының әскери қызметшісі автотұрақ кезекшісі нарядында бола тұра ұялы телефон арқылы өзінің Тикток парақшасынан тікелей эфирге кірген. Шекара басқармасы басшысының ұялы телефон пайдалануға тыйым салған бұйрығын қасақана орындамаған", - дейді сотта.

Сот отырысында шекарашы өз кінәсін мойындап, отбасының жалғыз асыраушысы екенін, төрт баласы бар екенін айтып, жеңіл жаза қолдануды сұраған.

"Сот қаулысымен қызметкерге 25 айлық айыппұл 30% мөлшеріне дейін қысқартылып, 68810 теңге айыппұл салынды. Қаулы заңды күшіне енді", - дейді облыстық сотта.