Қызылордада жануар тістеген 1,5 мыңнан астам адам дәрігерге жүгінді

Бұл өткен жылдың есепті кезеңіндегі көрсеткіштен жоғары. Мамандар мұның себебін адамдардың өз денсаулығына жауаптылықпен қарауымен байланыстырады.

— Облыс аумағы аса қауіпті құтырма ауруының табиғи ошағында орналасқан. Алайда биыл адамдар арасында бұл қауіпті ауру тіркелген жоқ. Дегенмен өткен жылмен салыстырғанда медициналық көмекке жүгінушілер саны бойынша динамика жоғарылап отыр. Өйткені жүйелі жүргізілген санитариялық ағарту жұмыстарының арқасында тұрғындар құтырма ауруының қауіптілігін түсінді. Одан қалай сақтану керегін де біледі. Жануардан жарақат алған кезде бұрынғыдай денсаулыққа бейжай қарамайды, — деді департамент басшысының орынбасары Әлия Әбдіқайымова.

Зардап шеккендердің 75,5%-ы иттен, мысықтан — 20,7% және басқа жануарлардан — 3,8.

— Жарақаттанушылардың 4 күн ішінде медициналық көмекке жүгіну көрсеткіші 98% болды. Соның 2,6%-ы медициналық көрсеткіштеріне сәйкес ауруханаларға жатып ем алды. 49-%-ы шартты 50,6%-ы шартсыз курс бойынша құтырмаға қарсы антирабикалық екпемен қамтылды. Құтырма ауруының арнайы емі жоқ, бірақ алдын алу өте маңызды. Сондықтан жануарлардың тістеуі немесе тырнауы кезінде зардап шеккен адамға дереу медициналық көмекке жүгініп, құтырмаға қарсы антирабикалық екпе алуы қажеттігін еске саламыз, — деді департамент өкілі.

Мамандар құтырма ауруының инкубациялық кезеңіне мән беруді сұрады. Оның ұзақтығы, яғни адамда аурудың алғашқы белгілері пайда болғанға дейін 10-нан 90 күнге дейін, кейде 1 жылдан астам уақытқа созылады.

Еске салсақ, жақында Қостанай облысының Сарыкөл ауданында жеке үй ауласындағы иттен құтырма дерегі тіркелді.