Рақымшылыққа кірмейтін қылмыстар мен тұлғалар жарияланды

Рақымшылық тек азаматтар мен мемлекет қауіпсіздігіне қауіп төндірмейтін белгілі бір қылмыстық және әкімшілік құқық бұзушылық жасаған тұлғаларға қолданылатын болады.

Саденов атап өткендей:

"Қауіпті қылмыстар жасағандар, оның ішінде терроризм, экстремизм, жемқорлық, кәмелетке толмағандардың жыныстық тұтастығына қарсы қылмыстар, азаптау, сондай-ақ рецидивистер мен іздеуде жүрген тұлғалар рақымшылыққа кірмейді."

Сонымен қатар министр әкімшілік рақымшылық аясында жеке тұлғалардың орындамаған айыппұлдарының толық немесе жартылай кешірілуі мәселесі қарастырылатынын еске салды:

"Бұл тұлғалардың категориялары, айыппұл сомалары мен оны кешіру тәртібі уәкілетті орган тарапынан заң жобасын әзірлеу кезінде егжей-тегжейлі пысықталады", – деді Саденов.

Еске салсақ, бұған дейін ІІМ мен Әділет министрлігі әкімшілік рақымшылықты өткізуге тапсырма алған болатын.