Республика күні: бірқатар өңірде 12 мектеп пайдалануға берілді

АСТАНА, 27 қазан – Sputnik. Қазақстанда Республика күніне орай сегіз өңірде 12 жаңа мектеп пайдалануға берілді, деп хабарлайды Sputnik Қазақстан.

Оқу-ағарту министрлігі таратқан мәліметке сәйкес, Алматы қаласында бірден төрт жаңа форматтағы мектеп жұмыс істей бастады. Солардың бірі - Медеу ауданындағы №220 мектеп сол жердегі орын тапшылығын толығымен шешіп отыр. Жаңа ғимаратта 2 мың оқушы оқи алады.

Басқа өңірде пайдалануға берілген жаңа мектептер:

Жамбыл облысының Қарасу және Қаракемер ауылдарындағы екі жаңа мектеп;

Маңғыстау облысының Мұнайлы ауданында "Келешек мектептері" ұлттық жобасы аясында салынған 900 орындық 11-ші мектеп;

Түркістан облысының Сауран ауданындағы №5 мектеп, ол да "Келешек мектептері" ұлттық жобасы аясында салынды;

Батыс Қазақстан облысының Достық ауылындағы 1200 оқушыға арналған жаңа форматтағы мектеп;

Ақмола облысының Көкшетау қаласында апатты ғимараттың орнына салынған №10 жаңа мектеп;

Қарағанды облысының Жарық ауылында ұлттық жоба аясында салынған жаңа мектеп;

Шығыс Қазақстан облысының Игілік ауылындағы жаңа мектеп.

Жаңа мектептердің басым бөлігінде конференц-зал, STEM-зертханалар, робототехника кабинеті, коворкинг орталығы, сондай-ақ шеберхана мен ғылыми зертхана, жасанды интеллект технологиясымен жабдықталған интерактивті тақталар бар.

Айта кетері, 2025–2026 оқу жылында республика бойынша жалпы 232 білім беру ұйымы салынады.