Сайлау тәртібіне қатысты Трамптың жарлығы күшінде қалды

АҚШ-тағы федералдық сот президент Дональд Трамптың сайлаушылардың бірыңғай тізімін құру және пошта арқылы дауыс беруді шектеу туралы жарлығының күшін уақытша тоқтату жөніндегі өтінішті қабылдамады, деп хабарлайды Евронью́с.

Судья Карл Николс демократтар мен құқық қорғаушылардың «жарлық Конституцияға қайшы, өйткені сайлау ережелерін белгілеу құқығы штаттар мен Конгреске тиесілі» деген уәжін негізсіз деп тапты. Оның айтуынша, жарлық әлі толық іске қосылмағандықтан, оны бұғаттау ерте болады.

Бұл шешім Трамп әкімшілігі құжатты жүзеге асыруға кіріскен жағдайда, кейінгі сот талқылауларына жол ашып отыр. Қазірдің өзінде Бостонда осы жарлықты тоқтату туралы бөлек іс қаралуда.

Жарлыққа сәйкес, федералдық билік сайлаушылардың тізімін жасап, пошта қызметі бюллетеньдерді тек сол тізімге енгізілген азаматтарға жеткізуі тиіс. Сайлау органдары мен пошта қызметкерлерінің кәсіподағы мұндай тәсіл теріс пайдалану мен ұйымдастырудағы қиындықтарға әкелуі мүмкін деп алаңдаушылық білдірген.

Трамп 2020 жылғы сайлаудан кейін пошта арқылы дауыс беруде кең көлемді заңбұзушылықтар болғанын бірнеше рет мәлімдеген, бірақ жүргізілген тексерістер мұндай фактілерді растамаған.

Бұл шешім әзірге праймериз бен алдағы аралық сайлауларға тікелей әсер етпейді, алайда дауыс беру тәртібіне қатысты саяси және құқықтық тартыстардың жалғасатынын көрсетеді.

Бүгін, 12:48