Сарапшы: Тұрғын үй кезегіндегі 257 мың адам түгендеуден өтті

- Қазіргі таңда әр азамат екінші деңгейлі банктер арқылы баспана қаржысын жинап, ипотекаға үй ала алады. Бұл тұста сарапшылар «7-20-25» тиімді бағдарлама ретінде бағалайды. Мәселен, 30 млн теңгеге баспана алғанда ай сайынғы төлем шамамен 169 мың теңгені құрайды. Дегенмен, бағдарламаның өзіндік талаптары бар: соңғы 18 айда үміткердің атында тұрғын үй болмауы тиіс.

Сондай-ақ несиелік тарихы соңғы 3-5 жыл ішінде таза болуы және ресми айлық табысы кемінде 400 мың теңге болуы қажет. Осы талаптарға сай келген азаматтар бағдарлама арқылы баспанаға қол жеткізе алады.

Бұдан бөлек, екінші деңгейлі банктерде стандартты ипотекалық бағдарламалар да бар. Олар тұрақты түрде жұмыс істейді. Кейбір банктерде баспана құнының 50 пайыз жарнасы болған жағдайда ай сайынғы табысты растамай ақ ипотека рәсімдеуге болады, - деді ол.

Осы тұста сарапшы тұрғын үй саласындағы тағы бір жаңалыққа тоқталды. 2 наурыздан бастап «Отбасы банк» баспананы тек түгендеуден өткен азаматтарға ғана бөледі. Егер кезекте тұрған азамат түгендеуден өтпесе, үй алу процесіне қатыса алмайды.

- Түгендеу – банк базасындағы жеке мәліметтерді жаңарту процесі. Мысалы, екі баласы бар отбасы тұрғын үй кезегіне тұрғаннан кейін жанұяда тағы бала дүниеге келсе, бұл өзгеріс банк жүйесінде көрсетілуі тиіс. Жаңартылған ақпарат отбасының тұрғын үйге деген қажеттілігін нақтылап, тиісті шаршы метрдегі баспананы таңдауға мүмкіндік береді. Айталық, екі баласы бар отбасы шағын пәтерге үміткер болса, төрт-бес балалы болған жағдайда кеңірек баспана алу құқығына ие болады. Ресми дерекке сәйкес, бүгінде 642 мың адам тұрғын үй кезегінде тұр. Оның 257 мыңы түгендеуден өткен. Бірақ 55 мың адам кезектен шығарылған. Себебі, бірі баспана алып қойған, енді бірі өзге негіздермен тізімнен шыққан. Бұл өз кезегінде кезектің жылжуына және баспана алу мерзімінің жақындауына ықпал етеді, - деді сарапшы.

Спикердің айтуынша, мүмкіндігі шектеулі азаматтар үшін де арнайы өзгерістер енгізілген.

- Бұған дейін мүмкіндігі шектеулі азаматтар мен жетім балалар үшін табысты растау тек жақын туыстары арқылы ғана жүзеге асырылатын. Қазір «Отбасы банк» бұл талапты жеңілдетіп, табысты растау мүмкіндігін кеңейтті. Енді жеңілдетілген ипотеканы рәсімдеу кезінде тек туыстары ғана емес, өзге де азаматтар көмектесе алады. Тағы бір жаңалық, бұрын мүмкіндігі шектеулі азамат үшінші топқа ауысқан жағдайда ипотека рәсімдеу мүмкіндігі шектелетін. Ал жаңа өзгеріске сәйкес, азаматтың тұрғын үй кезегіндегі реті сақталады, - Мақпал Ерман.

Еске сала кетейік, Түркістан облысы тұрғын үй саны бойынша көш бастап тұр.