Семей орманындағы өртті сөндірген тракторшы Құрмет орденімен марапатталды

Мемлекет басшысы Қасым-Жомарт Тоқаев Құтқарушылар күні қарсаңында осы салада табысты еңбек етіп келе жатқан бір топ азаматты марапаттады. Олардың қатарында «Семей орманы» мемлекеттік резерватының Бегенев филиалына қарасты Дөңгелек орман шаруашылығының тракторшысы Елеуов Ерлан Мұратұлы да бар. Ол Президент Қаулысымен «Құрмет» орденіне ие болды, - деп хабарлайды Aikyn.kz.

Елеуов Ерлан Мұратұлы – 1962 жылы 19 қазанда Абай облысында дүниеге келген.

Ол орман шаруашылығы саласындағы еңбек жолын 1995 жылдың қыркүйек айында бастаған. 2020 жылдың қазан айынан бастап ҚР Экология және табиғи ресурстар министрлігінің РММ «Семей орманы» мемлекеттік табиғи резерватының Бегенев филиалына қарасты Дөңгелек орман шаруашылығында тракторшы болып қызмет атқарады.

Еңбек жолында орман шаруашылығы мен табиғатты қорғау саласына ерекше еңбек сіңірген жан. Орман алқаптарын қалпына келтіру жобаларына қатысып, 1000 гектардан астам жерге ағаш отырғызуға үлес қосты. Орманды қорғауға арналған қоғамдық қозғалыстардың құрылуына және олардың жұмысын қолдауға, халық арасында экологиялық сауаттылықты арттыруға белсене атсалысты.

Далалық, тұрмыстық және орман өрттерін сөндіруге бірнеше рет қатысып, орман дақылдарын отырғызу мен күтіп-баптау жұмыстарында белсенділік танытты. Жас қызметкерлер және студенттермен өзінің көпжылдық тәжірибесі мен білімін бөлісіп, көмек көрсетіп келеді. Орман дақылдарын себу мен күтіп-баптау бойынша өндірістік тапсырмаларды жоспардан асыра орындап, бекітілген учаскелер бойынша жоғары өнімділікке қол жеткізе білді.

Ерлан Мұратұлы бірнеше ірі орман өрттерін сөндіруге тікелей қатысып, кәсібилігін, жанқиярлығы мен төтенше жағдайлар кезінде жедел әрекетке дайын екенін көрсетті.

2020 жылдың 23-24 сәуірі аралығында «Семей орманы» Байдәулет орман шаруашылығының ерекше қорғалатын табиғи аумағында болған өртті сөндіруге қатысты. Ғарыштық мониторинг деректеріне сәйкес, жалпы өрт аумағы 6 699,84 гектарды құраған, оның ішінде 5 429,13 гектары – мемлекеттік орман қоры жерлері. Белсенді ошақ аумағы 3 948 гектар болған. Ерлан Мұратұлының жедел әрі үйлесімді әрекетінің арқасында өрттің таралуының алдын алуға мүмкіндік туды.

2022 жылдың 21 маусымында «Семей орманы» Грачи орман шаруашылығына қарасты Долон филиалы аумағында, Грачи ауылынан 15 км жерде шыққан өртті сөндіруге қатысты. Өрттің жалпы аумағы шамамен – 280 гектар, оның ішінде 150 гектары – орман алқабы, 130 гектары – ауылдық округ жерлері.

2025 жылдың 4 сәуірінде Абай облысы, Бесқарағай ауданы, Қоянбай ауылында басталған ірі өртті сөндіруге қатысты. Күшті желдің әсерінен өрт «Семей орманы» табиғи резерватының Морозов филиалына тараған. Ресми мәлімет бойынша, өрт 1 200 гектар жерді шарпыған, оның ішінде 800 гектары – дала, 400 гектары – орман алқаптары. Қиын жағдайға қарамастан, табандылық танытып, өрттің елді мекендерге таралуын болдырмауға белсене қатысты.

Осылайша, Елеуов Ерлан Мұратұлы орман шарушылығы саласындағы 30 жылдан астам қажырлы еңбегі мен жанқиярлығының лайықты бағасы ретінде «Құрмет» орденімен марапатталды.