Семейде халық қала әкімін таңдады

Бұл тарихи оқиға - азаматтық қоғамды, құқықтық мемлекетті қалыптастыру жолындағы маңызды кезең. Қоғамның белсенділігі билік пен халық арасындағы сенімді нығайтады. Кеше қалада 128 сайлау учаскесі таңғы 07:00- ден кешкі 20:00- ге дейін жұмыс істеді. Халық учаскелерге келіп, сайлау процесіне белсенді қатысты. Қазір аумақтық сайлау комиссиясы тұрғындардың дауысын санап жатыр.

Жаңа сайлау форматы әділдік пен ашықтық принциптеріне негізделген. Тұрғындардың әкімді сайлауы жергілікті басқарудың тиімділігін күшейтеді.  Бұған дейін бұл тәжірибе аудан деңгейінде сыналды. Енді қала әкімдерін де халық таңдайды. Осы тарихи оқиға Семейден басталды.

Орал Шәріпбаев, қоғам белсендісі:

- Бүгін 13 қазан, сайлау өтті. Көңіліміз орнына түсті. Жағдайымыз пісті. Неге? Халық өз таңдауын өзі жасады. Өз сайлауын өзі сайлады. Өз әкімін өзі таңдады. Бұл не деген сөз? Бұл - демократияның бүгінгі Жаңа Қазақстанда орындалып жатқанының белгісі болып табылады.

Семей — жастар қаласы. Олардың сайлауға белсенді қатысуы — мемлекет дамуының жаңа сатысы. Мұндағы белсенді буын алғаш рет өткен әкім сайлауына атсалысып, қоғам жаңғыруының қозғаушы күшіне айналды.

Семей бойынша сайлау учаскелерінде 220 мыңнан астам адам тіркелген. Аумақтық сайлау комиссиясы өкілдерінің айтуынша, саяси науқан кезінде ешқандай құқықбұзушылық тіркелмеген. 

Гүлжан Қуанышева, қалалық аумақтық сайлау комиссиясының төрағасы:

-  Сайлау кезінде ешқандай құқықтық заңбұзушылық болған жоқ. Барлық Қазақстан Республикасының сайлау заңнамалаарының нормаларына сәйкес дұрыс өтті. ҚР сайлау туралы заңына сәйкес үш күн мерзімінде біз сайлаудың қорытындысын жариялай аламыз. 

Қазір аумақтық сайлау комиссиясы халықтың дауысын санап жатыр. Заң бойыншас саяси науқанның қорытындысы үш күн ішінде жарияланады. 

Авторлары: Рүстем Қайратұлы, Мәди Базарбеков