Семсерлесуден ӘЧ: Ел қоржынына тарихи жүлде түсті

Жарыстың алғашқы күні Қазақстан құрамасы жүлдеге қол жеткізді. Қазақстандық Нұрмұхаммед Жайлыбай қылыштасудан қола медальға ие болды.

Отандасымыз жартылай финалға дейін жетіп, шешуші кезеңде Түркия өкілі Фуркан Яманға 13:15 есебімен жол берді. Осылайша, Жайлыбай турнирді үшінші орынмен аяқтады.

ҚР ҰОК мәліметінше, жарыс барысында ол Мажарстан спортшысы Даниэль Беркешиді (15:6), жапониялық Мотоки Кавахараны (15:7), ресейлік Ярослав Борисовты (15:14) және АҚШ өкілі Эмилио Патурзоны (15:13) жеңді.

Айта кетейік, тағы бір қола жүлдені мысырлық Ахмед Хешам иеленді. Ол жартылай финалда америкалық Уильям Морилудан жеңілді. Фуркан Яман (Түркия) жарыс жеңімпазы атанды.

Айта кетейік, бұл – жасөспірімдер арасындағы әлем біріншілігінде жекелей сында алған Қазақстанның алғашқы медалі.

Еске салайық, Қазақстан құрамасы көркем гимнастикадан Францияның Тье қаласында өтетін Гран-при сериясының үшінші кезеңіне қатысады.