Сенат қабылдаған жаңа заң бойынша жасанды интеллект өзінің адам емес екенін айтуы міндетті

BGR сайтының хабарламасына сүйенген Aikyn.kz, пайдаланушы чат-ботты адам екен деп қалса, заң оны қалай қорғайтынын түсіндіреді.

Губернатор Гэвин Ньюсом: «Әр адам кіммен сөйлесіп отырғанын, адаммен бе, әлде жасанды интеллектпен бе, нақты білуі тиіс». Фото opb.org сайтынан алынды. Авторлығы: AP / Rich Pedroncelli 

Енді жасанды интеллект (ЖИ) негізінде жұмыс істейтін барлық чат-боттар егер пайдаланушы оларды адам деп қателесуі мүмкін болса, өздерінің жасанды жүйе екенін хабарлауға міндетті болады.

Жаңа заңға сәйкес, чат-боттарды әзірлеушілер пайдаланушыға анық және түсінікті хабарлама ұсынуы тиіс. Чат-бот өзінің адам емес, жасанды интеллект құралы екенін көрсетуі керек.

Құжатта бұл талап «пайдаланушы чат-ботпен сөйлескенде оны адам деп ойлап қалуы мүмкін жағдайларда» қолданылады деп көрсетілген. Бұл заң пайдаланушыға қызмет көрсету чат-боттарына немесе дауыстық көмекшілерге қатысты емес. Себебі олар пайдаланушымен ұзақ әрі жеке байланыс орнатпайды.

Жаңа заң талабы ChatGPT, Gemini, Claude және адамша сөйлей алатын өзге де кеңейтілген жасанды интеллект жүйелеріне қатысты.

Калифорнияның бұл заңды қабылдау себебі қандай?

Соңғы жылдары адамдардың жасанды интеллект пен адам арасындағы айырмашылықты ажырата алмауы жиі байқалып келеді. ЖИ-дің тілдік модельдері жетілдірілген сайын, чат-боттар адамдармен эмоциялық деңгейде сөйлесе бастады. Кейбір пайдаланушылар олармен тек ақпарат алу үшін емес, эмоционалдық қолдау немесе виртуалды қарым-қатынас үшін сөйлеседі.

Бұл үрдіс бірқатар даулы жағдайларға алып келді. OpenAI компаниясы бір жасөспірім ChatGPT-мен сөйлескеннен кейін өз-өзіне қол жұмсаған соң сотқа тартылды. Осы оқиғадан кейін OpenAI қосымша қауіпсіздік шараларын, соның ішінде ата-ана бақылауы мен пайдалану мониторингін енгізді.

Бұл шаралар тек ірі платформаларға қатысты. Ал интернетте «жасанды достар» немесе «виртуалды серіктестер» түріндегі көптеген қосымшалар пайда болуда. Бұл жерде пайдаланушылар шынайылық пен цифрлық қиялдың шекарасын жиі жоғалтады.

Жаңа заң осындай жағдайларды болдырмауға бағытталған. Ол психологиялық және эмоциялық тәуекелдерді азайтып, адамдардың жасанды интеллекті шын адам деп қабылдауынан сақтандыруды көздейді.

Губернатор Гэвин Ньюсомның әкімшілігі заңның басты мақсатын «пайдаланушыны қорғау және ашықтықты қамтамасыз ету» деп белгілеген. Олардың пікірінше, әр адам кіммен сөйлесіп отырғанын, адаммен бе, әлде жасанды интеллектпен бе, нақты білуі тиіс.

Бұл заң АҚШ-тың басқа штаттарына және өзге елдерге үлгі болуы мүмкін. Өйткені бүгінде жасанды интеллектпен қарым-қатынастың этикалық және құқықтық аспектілері жаһандық деңгейде талқылануда. Сарапшылардың айтуынша, осы заң арқылы технологиялық орталық саналатын Калифорния цифрлық этика мен ЖИ реттеуінің жаңа стандартын қалыптастырып отыр.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.