Серілік әндер некеге мәжбүрлеу, сталкинг туралы заңдарға қайшы ма вице министр жауабы

- Ұлттық арнадан кеше кино болып жатыр, сериал. «Көнбесең, алып қашамын» дейді. «Ештеңе қылмайды, мені де алып қашқан. Аман-есен жүрміз», - дейді. Бұл не сонда? Ұлттық арна мемлекет саясатына қарсы ма деген ой туындайды ғой. Мәдениет министрлігі мен Ішкі істер министрлігі бір-бірін естімейді ме деген ой туындайды. Біз заң шығарамыз. Ол заңды менсінбей, күлкі қылған дұрыс емес деп ойлаймын, - деді Мұрат Әбенов.

Мәдениет және ақпарат министрінің орынбасары Қанат Ысқақов депутат келтірген фактіні тексеріп, расталса ақпарат ресурсынан шара қолданылатынын айтты.

Бірақ бұл мәселеге тағы бір депутат Ринат Зайыт қарсы уәж айтты.

- Әріптестерімнің сұрақтарынан менде де сұрақ туындап отыр. Мына жерде мен түсінбейтін бір әңгімелер шықты. Көркем шығарма деген болады. Қазір сіздер қызды-қыздымен

«Мен жасымда жігіттер топтан астым,

Бір түнде сегіз қызды алып қаштым», - деп ән айтқандарды соттап жүрмейміз бе?

«Егер мені шын сүйсең, асыл еркем,

Ертең кешке дайын бол қашуыңа-ай», - деген халық әні бар. Бұл қалай болады?... Ертең фольклорымыздан айырылып, Ақселеу (Сейдімбек) марқұмның «Бейпіл сөздерін» оқи алмай қалып жүрмейік, - деді депутат.

Әңгімеге Мәжіліс төрағасы Ерлан Қошанов араласып:

- Ондай ән айту үшін Иманжүсіп болу керек қой, - деп мысқылдады.

Ал вице-министр Қанат Ысқақов некеге мәжбүрлеу әрекеттеріне, сталкингке қарсы қабылданған заңдардың фольклорға тигізетін кері әсері болмайтынын, Конституцияда цензураға тыйым салынғанын айтты.

Еске салсақ, биыл жазда некеге тұруға мәжбүрлеу мен «дропперлік» үшін қылмыстық жауаптылық енгізілген еді.