Шахановтың сөзін дайындап берген Арон Атабек : Диссиденттің қызы ел естімеген шындықты айтты

Елге белгілі ақын, диссидент, қоғам белсендісі Арон Атабектің қызы Алма Нутушева желідегі парақшасында әкесі туралы жазба жариялады, деп хабарлайды Arasha.kz.

Жазбада Алма Нутушева Арон Атабектің қайтыс болғаннан кейін де ресми түрде ақталмауы қоғамда үлкен резонанс тудырып отырғанын атап өтеді. Оның айтуынша, Желтоқсан оқиғасынан кейін қатысушылардың репрессия құрбандары мәртебесін алуына тікелей себепкер болған тұлғалардың бірі – Арон Атабек.

"Арон Атабектің тіпті қайтыс болғаннан кейін де ақталмауы – бүгінге дейін қоғамда үлкен резонанс тудырып отыр! Желтоқсан оқиғасынан кейін адамдардың репрессия құрбандары мәртебесін алуына Арон Атабектің тікелей еңбегі сіңді. Кремльде Мұхтар Шаханов оқыған хаттың авторы – дәл осы Арон Атабек. Арон мен оның бауыры Рашид Нутушев өз өмірлеріне зор қауіп төнгеніне қарамастан, Мәскеуге баруды ұйымдастырды. Бұл қадам тарихтың бағытын түбегейлі өзгертті. Бүгінде Қайрат Рысқұлбеков сияқты Желтоқсан қаһармандарының есімдері көшелерге беріліп жатыр. Ал Арон Атабек ше? Егер ол болмағанда, ештеңе болмас еді! Менің әкем – Арон Атабек, оның бауыры Рашид пен Хасен Қожахмет 1986 жылы алаңға алғашқылардың бірі болып шықты. Қаза тапқандарға аза тұту рәсімін өткізуді, Желтоқсан оқиғасына әділ баға беруді алғаш талап еткен де – Арон Атабек. Арон Атабектің арқасында Алматы қаласының Алатау ауданы құрылып, бүгінгі күнге дейін дамып келеді", – деп жазды Алма Нутушева.

Арон Атабек Нұтушев (1953-2021) – қазақстандық оппозиция жетекшісі, ақын, публицист әрі қоғам қайраткері. Ол 1986 жылғы Желтоқсан көтерілісіне қатысып, кейін осы оқиғаға әділ саяси баға беруді талап еткен белсенділердің алдыңғы қатарында болды. 1989 жылы Кремльде Мұхтар Шаханов оқыған тарихи хаттың авторларының бірі ретінде танылды. Атабек "Жерұйық", кейін "Алаш" ұлттық қозғалыстарын ұйымдастырып, қазақ мемлекеттілігі мен егемендігін ашық қорғады. Саяси қудалауға ұшырап, 1990-жылдары Мәскеу мен Әзірбайжанда эмиграцияда өмір сүрді. 2000-жылдары Алматыдағы Шаңырақ, Бақай секілді ықшам аудандар тұрғындарының баспана құқығын қорғауға белсене араласты. 2006 жылғы Шаңырақ оқиғасынан кейін Арон Атабек тұтқындалып, 18 жылға сотталды. Құқық қорғаушылар оны саяси тұтқын деп танып, үкімді саяси тапсырыс деп бағалады. Ол түрмеде ауыр жағдайда отырып, өлеңдер мен публицистикалық мақалалар жазуын тоқтатпады. 2021 жылы денсаулығына байланысты босатылып, сол жылы 24 қарашада Алматыда қайтыс болды.