​Шайдоровқа төленген төлем туралы мәліметтер неге жарияланды министрдің жауабы

Туризм және спорт министрі Ербол Мырзабосынов ведомство бұған дейін жариялаған Михаил Шайдоровтың жалақысы және оны даярлауға жұмсалған шығындар туралы ақпаратқа түсінік берді.

Баспасөз брифингінде министрлік басшысы бюджет қаражаты жабық ақпарат емес екенін және барлық мәлімет көпшілікке қолжетімді екенін баса айтты.

“Бізде бюджет жасырын емес. Барлық ақпарат ашық және жалпыға бірдей қолжетімді”, — деп атап өтті министр.

Олимпиада делегациясының құрамына қатысты сұрақтар

Журналистер сондай-ақ қысқы Олимпиада ойындарына жіберілген делегацияның құрамы және сапарға жұмсалған бюджет шығындарының көлемі туралы сұрады.

Министрдің айтуынша делегацияның құрамын тиісті бұйрық бекітеді, ал әрбір қатысушы нақты міндеттерді орындады.

“Растай аламын: әрбір адамның халықаралық аренада спортшылармен жұмыс істеу кезінде нақты мақсаттары болды. Онда артық ешкім бармаған”, — деді Ербол Мырзабосынов.

Қанша қаражат жұмсалды

Бұл ретте министр баспасөз брифингінде делегацияға кеткен шығындардың нақты сомасын айтқан жоқ. Ол журналистерге шығындардың егжей-тегжейлі көрсетілген толық жазбаша жауабын беруге уәде берді.

Осылайша ведомство спортшыларды даярлауға және халықаралық жарыстарға қатысуға байланысты бюджеттік шығындар туралы толық ақпаратты ашуға дайын екенін мәлімдеді.

Бүгін, 10:06