ШҚО да Балалар өнер мектебі жас таланттың шамшырағын жағып келеді

Шығыс Қазақстан облысы, Тарбағатай ауданындағы «Балалар өнер мектебі» он екі жылдан бері талай жас таланттың шамшырағын жағып келеді. Бұл шағын ғана ауылдық орталықта сурет, мүсін, қолданбалы өнер және сәулет бағыттары бойынша жүздеген өрен тәрбиеленіп, шығармашылыққа жол ашқан. 

Мектептен тәлім алған балалардың көбі өнерге деген құштарлығын жалғастырып, өздері қалаған жоғары оқу орындарына түсіп жатыр. Тіпті солардың бір бөлігі білімін шыңдап, туған жеріне ұстаз немесе жас маман ретінде қайта оралуда. Қала мен аудан орталықтарында мұндай мектептер жиі кездескенімен, шалғай ауылдарда өнерге баулитын орталықтар жоқтың қасы. 

Ақжардағы «Өнер мектебіне» кіре қалсаңыз, бос жүрген бір баланы байқамайсыз. Әрқайсысының зейін-ықыласы тек өнерде. Мәселен, қыштан құмыра жасап жатқан жеткіншектердің бас бұруға мұршасы жоқ. Өйткені нәзік жұмыс салғырттықты көтермейді. Ал тағы бір топ бүлдіршін жүнді бекітіп, өздеріне ұнаған суреттерін салып отыр. Әр қылшықтың орын-орынымен жатып, бейнемен қабысып кетуі маңызды.

Мұнда 200 бала қолөнердің сан түрін меңгеріп жүр. Мекеме директоры, мүсінші әрі суретші Әлібек Шоқановтың қолынан да қылқалам түспейді. Сиясы кеппеген жұмысын аяқтау үстінде. Ол орталықтан аз да болса өнер үйренген баланың, кейін далада қалмасына кәміл сенімді.

Әлібек Шоқанов, «Балалар өнер мектебінің» директоры:

- Суретші болу міндетті емес. Енді партада отырған 15 баланың бір-екеуінен нақты кәсіпқой суретші күтуге болады, ал қалғандарына: «сен дәрігер бол, мұғалім, инженер бол. Сенің сызғаның алдағы мамандыңыға өте көп пайдасын тигізеді», - деп айтамыз, ата аналарына да түсіндіріп айтамыз.

Ауыл баласының қиялын шыңдап келе жатқан білім ошағына әсіресе жоғарғы сынып оқушылары жиі келеді. Нұркен Сағатбек болашақта сәулетші болуды армандайды. Сондықтан қазірден бастап кәсіби суретшілерден дәріс алуды жөн көріпті.

Нұркен Сағатбек, мектеп оқушысы:

- Болашақта архитектор саласына түсу және ол жерде ең мықты маман болу өз еліме көмектесіп, құрылымдар,  ғимараттар салып, елімді дамытқым келеді. Ұстазыма келген соң қалай мөлшерлеп суретті түсіру керек екенін, өзінің заңдылықтарын үйрендім.

Мұнда компьютерлік графика арқылы сурет салуға да мән беріледі. Бастауыш сынып оқушылары бұл техниканы да жатсынбайды. 

Шалғайдағы ауыл-аймақта балаларға арналған мұндай ауқымды кешен жоқтың қасы. Сондықтан ата-аналар да өнер ордасының қадірін жақсы түсінеді. 

Дариға Қалимолдақызы, ауыл тұрғыны:

-  Әрине ауыл үшін, ауыл балалары үшін керек. Балаларымыз таңертең құлшынып,  тамағын ішпестен «апа мен өнерге барамын, суретімді саламын» деп кетеді, ағайын жақсы көреді.

Тәлім алған балалар түрлі додадан олжасыз оралған емес. Аймақтың атын шығарып, мәртебесін көтеріп келеді. «Ендігі мақсат - болашақта жаңа ғимаратқа көшіп, аудан суретшілерінің галереясын ашу», - дейді ұстаздар. 

Авторлары: Эльмира Ахметова, Жігер Бабаханов