Шымкентте 46 заңсыз қоқыс орыны анықталды

Шымкентте былтыр ғарыштық түсірілім көмегімен 46 заңсыз қоқыс орыны анықталды.

Экология департаментінің мәліметінше, мұндай заңсыздық Қаратау ауданында көп. Мамандар қоқыс орындарын санитарлық талапқа сай тазартқан. Ғарыштық түсірілім ғана емес, мобильді топтар ұйымдастырған рейдтік шаралар кезінде де рұхсатсыз қоқыс алаңдары анықталып отыр.

Бұл қаладағы жеке тұрғын үй секторы. Байқасаңыз, қоқыс тіпті тротуарға да төгілген. Көп қабатты тұрғын үйлердің маңында да осындай жағдай жиі кездеседі. Тұрғындар көбіне бейнебақылау камераларының жоқтығын пайдаланады. Былтыр ғарыштық түсірілімдер арқылы заңсыз 46 қоқыс орыны анықталған.

Ермахан Қозыбаев, қалалық экология департаментінің басшысы:

- Сонымен қатар Шымкент қаласының экология мамандарымен және қала прокуратурасымен қаладағы заңсыз қоқыстар анықтау бойынша жұмыстар жүргізіліп, жалпы осы мониторинг арқасында 30 шақты нүкте анықталды. Негізгі қалдықтардың пайда болатын жерлері адамдар жоқ жерлерде және камералар жоқ жерлерде пайда болады. 

Аумақтың санитарлық жағдайын тиісті деңгейде бақыламағаны үшін лауазымды тұлғалар жауапкершілікке тартылды. Аудан әкімдерінің орынбасарларына айыппұл салынды. Өйткені олар қоқыстың уақытылы шығарылуын бақылап, заңсыз қоқыс орындарының пайда болуына жол бермеуге міндетті.

БЛИЦ

- Жалпы қаламыз таза ғой. Басқа қалаларда болғанмын. Басқа қалалармен салыстырмалы түрде біздің Шымкент таза ғой. Көңілім толады, иә.

- Біз жазда, мысалы, барамыз жан-жаққа, тау жаққа. Бәрі тастап кетеді. Патриоттар, волонтерлер барып, тазалайды. Оны көріп жүрміз ғой. Бірақ әр адам өзі тазаласа, ондай лас болмайтын еді. 

Қалалық жайлы ортаны дамыту басқармасында заңсыз қоқыс орындары мен қоқыс жәшіктеріне қатысты өтініштер жедел түрде қаралады, дейді жауаптылар. Былтыр «Таза Қазақстан» акциясы аясында қаладан 31 мың тонна қоқыс шығарылған.

Нұрқожа Сапарбай, қалалық жайлы ортаны дамыту басқармасының бас маманы:

- Көп қабатты тұрғын үйлерде қоқыстардың алынбауы мәселесі жолданады. Ол үш күн уақыттың ішінде, мерзімі көрсетілген қысқа уақыт тазаланып, орындалып отырады. Одан өзге бізде жарықшамдар мәселесі бойынша және бейберекет жатқан қоқыстар болса, олар туралы немесе қандайда бір сындырып кету сол сияқты мәселелер бойынша арыздар түсіп жатады. 

Мұндай заң бұзушылықтар туралы хабарлаудың қазір түрлі тәсілі бар. Соның бірі TazaQazBot чат-боты. Тұрғындар фото мен мекен жайын көрсетіп, чатқа жолдай алады. Дегенмен, бұл туралы тұрғындардың бәрі біле бермейді. Халық арасында түсіндіру жұмыстарын жандандырып, чат-боттың тиімділігін арттыруға болады. Осылайша, әрбір заңбұзушылықты жауаптыларға жедел жеткізіп, мәселені дер кезінде шешуге мүмкіндік туады. Экологтардың айтуынша, заңсыз қоқыс орындары қоршаған ортаға ғана емес, қала тұрғындарының денсаулығына да қауіп төндіреді. Сондықтан бұл мәселені кешенді түрде шешу қажет.

Ғани Ізтілеуов, М.Әуезов атындағы Оңтүстік Қазақстан университеті "экология" кафедрасының профессоры:

- Тұрмыстық қалдықтардан бастап, суды үнемдеу, содан кейін қаланың атмосфералық ауасын ластанудан сақтау деген осы үш мәселені әлі де болса, келешекте шешу керек деп ойлаймын. Арнайы аппараттар, фандоматтар қойса. Пластик бутылканы қолданғаннан кейін соны өткізсе, соған 50 теңге болса да, 60 теңге болса да қайтып беретін болса, әрине, қоқыстардың пайда болуын азайтатын болады. 

Мамандардың айтуынша, әр тұрғын қаланы өз үйіндей көріп, жауапкершілік танытпаса, мәселе ушыға береді. Мониторинг жұмыстары мен ғарыштық түсірілімдерге иек артып қана қоймай, тазалықты әр тұрғын өзінен бастауы керек.

Асланбек Шығыр, Катерина Попкова, Нұрмахан Бекмұратов, Нұрмахан Мусатов