Шымкентте бағаны тұрақтандыру бойынша 100 ден астам меморандумға қол қойылды

Шымкентте азық-түлік бағасын тұрақтандыру бойынша 100-ден астам меморандумға қол қойылды.

Қала әкімдігі мен кәсіпкерлер тауар құнын бірлесіп бақылауға және инфляцияны тежеуге уағдаласты. Бұл шара мегаполис тұрғындарын қолдауға арналған.

Шымкенттің атқарушы билігі "Грамад", "F-Mart" ірі сауда желілерінің өкілдерін, базар иелерін, ұн, ет, сүт, жұмыртқа және нан өнімдерін өндірушілерді, сондай-ақ көтерме жеткізушілерді арнайы шақырды. Тараптар бағаны негізсіз көтермеуге келісіп, меморандумға қол қойды.

Айдын Кәрімов, Шымкент қаласы әкімінің бірінші орынбасары:

- Күнделікті мониторинг жүргізіп, Сауда департаментімен бірлесіп орталыққа да баяндама жасаймыз. Сондықтан алдағы уақытта осындай бірлескен жұмыс нәтижесінде инфляция деңгейін, оның үстіне тауарлық инфляция, тауарлық емес инфляция көлемін едәуір төмендетеміз деген ойдамыз. 

Талғат Мекамбаев, Ауыл шаруашылығы және ветеринария басқармасының басшысы:

- Баға негізсіз өзгермейді. Оны қадағалаймыз. Күнделікті мониторинг группасы бізде әр аудан әкімдігінде осындай мониторинг группасы бар. Бағаны қарап, күнделікті өзгеруін қадағалап отырамыз. 

Тізімге тауарлардың 56 атауы кірді. Меморандум бағалардың бірлескен мониторингін және негізсіз ауытқуларды тежеуді көздейді. Тараптар делдалдық байланыстарды қысқарту бағытында да жұмыс істеуге уағдаласты.

Азамат Көшімов, кәсіпкер:

- Бағаны әлеуметтік жағдайға қарап ұсынып жатыр бізге. Ол баға әрине енді екі жақты тарапта қаралып, тиімді жақтарына қарап, соған қарап, келісіп қол қойып жатырмыз. Меморандум бұл жерде енді көбінде 1 жылға қойылады. 

Шымкентте әлеуметтік павильондар желісі де кеңейтілуде. Мұнда өнімдер артық үстемесіз тікелей өндірушілерден жеткізіледі. Бүгінде қалада осындай 17 орын бар. Олардың көпшілігі көпқабатты үйлердің аулаларында, ірі базарлары жоқ аумақтарда орналасқан.

Достық Талғатұлы, Нұрмахан Бекмұратов, Нұрмахан Мұсатов