Tallinn University мен QyzPU арасында меморандумға қол қойылды

Жиынға Эстония президенті Алар Карис, Қазақстан Республикасының Ғылым және жоғары білім министрі Саясат Нұрбек, сондай-ақ Эстонияның жетекші университеттері ректорлары арнайы қатысты. 

Форум аясында Қазақ ұлттық қыздар педагогикалық университетінің Басқарма төрағасы – ректордың міндетін атқарушы Сәбит Суатай  мен Таллин университетінің ректоры Ты́ну Вийк өзара түсіністік туралы меморандумға қол қойды. 

Меморандум аясында тараптар мектепке дейінгі және бастауыш білім беруге қатысты заманауи педагогикалық тәсілдер мен өзекті мәселелерді бірлесе зерттеу үшін ортақ академиялық алаң құрады. Сонымен қатар  ынтымақтастық цифрлық технологиялар мен жасанды интеллектке негізделген инновациялық білім беру шешімдерін әзірлеу мен енгізуді қамтиды. Тараптар ұзақмерзімді ынтымақтастықты қамтамасыз ететін тұрақты серіктестік желісін қалыптастыруды көздейді.

Академиялық ынтымақтастықтың болашақ бағыттарын талқылау барысында QyzPU ректорының міндетін атқарушы Сәбит Суатай мектепке дейінгі білім беру жүйесін дамытудағы бірлескен бастамалардың маңызын атап өтті.

«Бүгінгі талқылаулар QyzPU мен Таллин университеті арасындағы стратегиялық әріптестікті жаңа деңгейге көтеретініне сенімдімін. Біздің бірлескен бастамаларымыз мектепке дейінгі білім сапасын арттыруға елеулі үлес қосады», – деді ол.

Меморандумға қол қою рәсімі – екі университет арасындағы ынтымақтастықтың ресми бастамасы және білім беру саласындағы бірлескен жобаларды дамытуға жол ашады. Ынтымақтастық аясында жүргізілетін зерттеулер мен тәжірибе алмасу білім беру сапасын арттыруға, заманауи педагогикалық тәсілдерді енгізуге және цифрлық технологияларды қолдану арқылы инновациялық шешімдерді жүзеге асыруға бағытталады.