Шымкентте фельдшерлер видеожетон тағып жүреді

Шымкенттегі жедел жәрдем бригадаларының фельдшерлері видеожетон тағады, деп хабарлайды 24KZ. Құрылғылар SOS батырмасы және геолокациямен жабдықталған. Маманның кезекшілігі аяқталғаннан кейін жазбалар автоматты түрде базаға жүктеледі. Пилоттық жоба сала қызметкерлерінің қауіпсіздігі мен жұмыс тиімділігін арттыруға бағытталған. Жалпы биыл елде 50-ден астам медицина қызметкеріне шабуыл жасалған.

Жедел жәрдем көлігі кезекті шақыртуға асығып барады. Олар үшін әр минут маңызды. Науқастың жанын аман алып қалуға асыққан дәрігерлер кейде өз басын қатерге тігіп жатады. Енді ақ халаттылардың қауіпсіздігі мен сапалы медициналық көмек көрсетуі үшін осындай видеожетондар беріліп жатыр.

Гауһар Шәдібек, қалалық жедел медициналық жәрдем станциясының қызметкері:

- Науқастармен келеңсіз жағдай болған кезде, түсініспеушілік болған кезде осы жетонды пайдаланып, сол арқылы біз өзіміздің қауіпсіздігімізді сақтаймыз.

Мұндай құрылғының қажеттілігі бұған дейін біраз айтылды. Соңғы жылдары  медицина қызметкерлері мен науқастардың арасында, кейде олардың туыстарымен де кикілжің жиілеген. Видеожетон жедел жәрдем бригадаларының жұмысын қадағалауға мүмкіндік береді.

Гөзәл Рафикова, қалалық жедел медициналық жәрдем станциясы бас дәрігерінің орынбасары:

- Видеожетонды шақыртуға бара жатқан кезде тағады. Осылайша пациентке дейінгі қозғалыс бағыты жазылады. Науқастың мекенжайынан стационарға дейінгі барлық үдеріс осы видеожетонда сақталады.

Құрылғы үздіксіз жұмыс істейді. Ондағы бейнежазбалар өңделмейді. Әрі қорғалған жүйеге автоматты түрде сақталады. Денсаулық сақтау басқармасы жобаның ауқымын кеңейту мәселесін қарап жатыр.

Бақытжан Абдуллаев, қалалық Денсаулық сақтау басқармасы басшысының орынбасары:

- Тек қана дәрігерлердің қауіпсіздігі емес, сонымен қатар медициналық көмекті дұрыс ұйымдастыру. Пилоттық жоба ретінде қазір басталып жатыр. Қазір жұмыстар әрі қарай жүргізіліп жатыр. Жылдың соңына қарай толық қамту деген жоспарымыз бар.

Қазір өңірдің медицина саласына тиімді цифрлық шешімдер енгізіліп жатыр. Науқастың жеке деректерін қарау үшін электронды медициналық карта жұмыс істейді. Сондай-ақ шақыртуларға дереу жету үшін жедел жәрдем көліктеріне GPS-мониторинг орнатылған. Бұған қоса жыл соңына дейін жасанды интеллектіге негізделген жобалар іске қосылады.

Авторлары: Асланбек Шығыр, Катерина Попкова, Нұрмахан Бекмұратов, Нұрмахан Мұсатов