Шымкентте науқастарды дәлізге жатқызған: әкімдік не жағдай болғанын түсіндірді

АСТАНА, 20 қазан – Sputnik. Шымкентте науқастар жұқпалы аурулар ауруханасының дәлізінде жатқаны жайлы видео әлеуметтік желіде таралып, қоғамда резонанс тудырды, деп хабарлайды Sputnik Қазақстан.

Otyrar басылымының мәліметінше әкімдік ауруханада күрделі жөндеу жұмыстары басталуына байланысты уақытша қиындық туындағанын хабарлаған.

Қазіргі таңда аурухананың он бөлімшесінің сегізі тәулік бойы жұмыс істеп тұр. Қауіпті жұқпалы ауруларды жұқтырған науқастарды қабылдау тоқтаған жоқ.

"Палаталар 2-4 төсекке есептелген және бөлек жуынатын бөлмелермен, желдету жүйелерімен жабдықталған. Пациенттер жаппай түскен жағдайда санитарлық нормаларға сәйкес дәліздерге уақытша орналастыруға рұқсат етіледі", - дейді әкімдік мамандары.

Бұл жағдай Денсаулық сақтау министрлігінің бұйрықтарымен реттеледі.

Тексеріс кезінде санитарлық талаптар мен медициналық этика нормаларының бұзылмағаны анықталды. Науқастар дәрігерлердің бақылауында болады, тәуір болып қалғандары емді үйде жалғастыруға жіберіліп жатыр.

Әкімдік эпидемиологиялық жағдайды бақылауда ұстап отыр. Медицина қызметкерлері белгіленген стандарттарға сай жұмыс істеп жатыр.