Словакия СІМ басшысы Украинаның НАТО ға кіруін қолдамайтынын мәлімдеді

АСТАНА, 10 қазан – Sputnik. Словакияның сыртқы және еуропалық істер министрі Юрай Бланар елдің Украинаның НАТО-ға кіруін қолдамайтынын мәлімдеді, деп хабарлады РИА Новости.

"Словакияның үкіметі мен парламентінде "Бағыт – социал-демократия" партиясы болған уақытта біз Украинаның НАТО-ға мүшелігін ешқашан қолдамаймыз", - деді Бланар.

Министр Украинаның альянсқа қосылу мәселесі Ресей мен Украина арасындағы талас-тартыс екенін айтты. Бланардың айтуынша, Словакия қақтығыстың ушығуын қаламайды және Ресей белгілеген "қызыл сызықтарды" елемейтін болса, үшінші дүниежүзілік соғыс басталуынан қауіптенеді.

Бұған дейін Владимир Зеленский Венгрияның ветосын айналып өту үшін Украинаның Еуроодаққа кіру процедурасын өзгертуді ұсынды.

Еуропалық кеңес төрағасы Антониу Кошта Венгрияның ветосын айналып өту үшін Украинаның одаққа қосылуына арналған келіссөздер жүргізу бойынша Еуроодақта дауыс беруді жеңілдетуді ұсынып жатқанын хабарлады.

Еуроодақ саммиті алдында Венгрия премьер-министрі Виктор Орбан Украинаның еуроинтеграциясына қатысты заңды күшіне енетін шешім бұл жерде қабылдануы мүмкін емес, өйткені Венгрия Киевтің Еуроодаққа қосылуын қолдамайды және бұл мәселе бірауыздан шешілуі керек деп мәлімдеді.