Соңғы кеші болуы мүмкін... Мейрамбек Беспаевты аман алып қалған қай әні?

Кезінде ауыр дертпен күресіп, қатты жүдеп кеткен Мейрамбек Беспаевтың жағдайы ел жадында. Көп сұхбат бермейтін әнші "Хабар" арнасындағы "Елге сәлем" бағдарламасында өміріндегі ең қиын кезеңдерді еске алды. Ал жары Мархабат сол сәтте-ақ оның сахнаға қайта оралатынына кәміл сенгенін айтты, деп хабарлайды Arasha.kz.

"Ол кезде Кәусарға аяғым ауыр еді. Мейрамбек қатты арықтай бастады. Ел арасында "әйелі тастап кетіпті", "енді сахнаға қайтып келмейді" деген әңгімелер тарады. Бірақ мен оған ешқашан сенбедім. Оның артында қызы, әке-шешесі, мен бар едім. Сол сенімнің арқасында ол қайта сахнаға шықты", – дейді әншінің жары.

Мейрамбек Беспаевтың айтуынша, ол бір айдың ішінде 30 келіге жуық салмақ тастағанымен, бастапқыда нақты диагнозын білмеген. Денсаулығы сыр беріп тұрған кезде сахнаға қайта оралмауым да мүмкін деген ой мазалағанын жасырмады.

"Тоқырау кез келген өнер адамының басынан өтеді деп ойлаймын. Ауырғанда өнерге зауқың болмайды, ән айтқың да келмейді. Өзіңмен өзің арпалысатын кезеңдер болады. Алғашында диагнозды білмей, түрлі жаман ой келді. Сол кезде ақын Қалқаман Саринге хабарласып, "Махаббатым, қайдасың қайда?" әнін жаздырдық. Бұл ән бола ма, болмай ма – оны да білмедік", – дейді әнші.

Оның айтуынша, әлсіздік соншалық, он метр жүргенде тоқтап қалатын халге жеткен.

"Бір айда 30-35 келі салмақ тастағанда қатты үрей болды. Соған қарамастан, өзімді жинап, студияға келіп, әнді әрең орындап шықтым", – деп еске алды ол.

Еске салайық, бір кезеңде Мейрамбек Беспаев ұзақ уақыт сахнадан көрінбей, ем қабылдаған еді. Сол тұста тыңдармандары оның жағдайына алаңдап, Республика сарайында өткен "МузАРТ" тобының концертіне "Мейрамбектің соңғы кеші болуы мүмкін" деген оймен жиналған. Кейін әнші бұл туралы: "Халықтың батасы мен тілегінің арқасында аман қалдым" деп айтқан болатын.