Сот сараптамасымен келіспейміз: Шымкентте құбыр жарылып, 4 5 үйдің тұрғындары далада қалды

Шымкентте былтыр ғана жаңадан салынып, пайдалануға берілген орталық су құбыры жарылып, бірнеше үйге залал келтірді, - деп хабарлайды Aikyn.kz сайты Аlmaty.tv-ға сілтеме жасап. 

 Су құбырының жарылып, бір сәтте төрт үй жарамсыз күйге түскен. Сол баспаналардың бірі – Жанат Қалтаеваға тиесілі. Былтыр ғана қоныстойын тойлаған әйел өз шаңырағынан қашуға мәжбүр. Себебі үйінің қашан опырылып түсері белгісіз.

«Үй жарамсыз, су мекемесі бұзып, қайта салып берсін. Үй тұрмақ, жері де жарамайды. Үй соғу үшін әуелі жерді қалыпқа келтіру керек. Пайда болған жыралар көрініп тұр», – деді қала тұрғыны Жанат Қалтаева.

Олқылыққа жол беріп, апатқа себеп болған жауапты мекеме бір ғана үйді сүріп, қайта тұрғызуға ниетті. Ал қалғандарын «жамап» құтылмақ. Тіпті кей шаңырақ бұл тізімге енбей де қалған.

«Көршілерге жаңа үй салып беріп жатыр. Ал менің баспанам сол қалпында тұр. Бұзған да, жөндеген де жоқ. Негізі мұндағы 4-5 үйді бұзу керек», – деді қала тұрғыны Әлия Ақбалаева.

Тұрғындардың қолындағы сараптама қорытындысы апатқа себеп – жарылған құбыр екенін анық көрсетіп тұр. Алайда жауапты мекеме мұнымен келіспейді. Керісінше, «қайта сараптама жүргіземіз» деп, мәселені созып отыр.

«Сот сараптамасымен келіспейміз. Жердің геологиясын алмай қорытынды шығаруға болмайды. Біз сол себепті сараптама тағайындадық. Біздің сараптама шығады»», – деді Су құбыры және канализация басқармасының басшысы Бағдат Байболов. 

Айта кетсек, жарылған құбыр өткен жылы ғана бюджет қаржысына тартылған. Кепілдік мерзімі де бар. Сол себепті басқарма шығынды есептеп, істі сотқа беруге дайындалып жатыр.

Егер сот шешімі олардың пайдасына шықса, барлық залал мердігер есебінен өтеледі. Ал әзірге тұрғындардың пәтерақысы мен жөндеуге кеткен қаржысын демеушілер жауып отыр.