Сотталған Гүлназ Серікбаеваның анасы колониядағы шабуыл туралы айтты

Атырауда Facebook желісіндегі жарияланымдары үшін үш жылға бас бостандығынан айырылған азаматтық белсенді Гүлназ Серікбаеваға, анасының айтуынша, басқа сотталғандар шабуыл жасаған.

26 қазанда Қызылорда тұрғыны Дәмеш Шілдебаева қоғамға және халықаралық құқық қорғау ұйымдарына үндеу жасап, қызының Алмагүл шағынауданында орналасқан әйелдер колониясында басынан өткен оқиғаны баяндады.

Әйелдің айтуынша, төрт сотталған әйел Серікбаеваның соңынан түзеу мекемесінің дәретханасына барған. Олардың екеуі шығатын жолды бөгеп тұрса, қалғандары белсендіге шабуыл жасап, шашынан тартып, ішінен ұрған.

Серікбаева көмекке шақырғанымен, оған тек басқа бір сотталған әйел араша түсіп, шабуылды тоқтатқан. Шілдебаеваның айтуынша, кейін осы әйелден куәлік көрсетпесі алынған.

Оқиғадан кейін белсенді әйелдің басы мен мойны ісіп, қан қысымы көтеріліп, денсаулығы нашарлаған. Оған медициналық көмек қажет болған.

Анасы шабуылды қызының саяси көзқарасына байланысты бұған дейін басқа сотталған әйелдермен арада туындаған жанжалдармен байланыстырады. Ол соққыға жығу әдейі ұйымдастырылған болуы мүмкін деп есептейді.

Шілдебаеваның айтуынша, Серікбаева шабуылға қатысты арыз жазғанымен, оқиғаға қатысы бар деген әйелдер бұрынғы жасағында қалған, ал белсенді әйелді жеке камераға ауыстырған.

Сондай-ақ анасы қызының алдағы уақытта киста алып тастау бойынша ота жасатуы керектігіне алаңдайды.

«Ана ретінде оның өмірі мен денсаулығы үшін қорқамын, қайтадан шабуыл жасала ма деп те алаңдаймын», — деді Дәмеш Шілдебаева.

Қызылордалық азаматтық белсенді Гүлназ Серікбаева бұған дейін қоғамдық қызметпен айналысқан. Атап айтқанда, Қытайдағы этникалық қазақтардың құқықтарын қорғау мәселелерімен айналысқан.

2026 жылғы 11 наурызда оның үйінде тінту жүргізілгеннен кейін белсенді ұсталды. Қылмыстық іс Facebook желісіндегі жарияланымдарына байланысты қозғалған.

2 шілдеде Қызылорда қаласының №2 соты Серікбаеваны Қазақстан Республикасы Қылмыстық кодексінің 174-бабының 1-бөлігі (әлеуметтік, ұлттық, рулық, нәсілдік, тектік-топтық немесе діни алауыздықты қоздыру) бойынша кінәлі деп танып, үш жылға бас бостандығынан айыру жазасын тағайындады.

Соттың психологиялық-филологиялық сараптамасы оның жарияланымдарынан орыс және қытай ұлттарының өкілдеріне қатысты жағымсыз пікірлерді анықтаған.

Мемлекеттік айыптаушы белсендіге алты жылға бас бостандығынан айыру жазасын тағайындауды сұраған. Ал Серікбаеваның өзі кінәсін мойындамаған.

Оның адвокаты Абдулла Бакбергенов қорғауындағы адамның қоғамдық-саяси мәселелер бойынша өз пікірін білдіргенін және басқа ұлт өкілдерін қорлауды мақсат етпегенін алға тартты. Үкім шыққаннан кейін қорғау тарапы оған шағым түсіретінін мәлімдеді.

Дәмеш Шілдебаева қызына қатысты қылмыстық қудалауды саяси астары бар іс деп санайды. Ол өз үндеуінде БҰҰ-ны, ЕҚЫҰ-ны, Еуропа Кеңесінің Парламенттік Ассамблеясын (ПАСЕ) және Еуропалық парламентті Серікбаеваның жағдайына назар аударуға, шабуылдың мән-жайын тексеруді талап етуге және оның қауіпсіздігін қамтамасыз етуге шақырды.

«Ақ Жайық» редакциясы Атырау облысы бойынша Қылмыстық-атқару жүйесі департаментіне түсініктеме алу үшін сауал жолдады.

Айгуль МАНСУРОВА

Бүгін, 16:51