Ұйықтар алдында телефон қарау балалардың ұйқысы мен зейінін бұзады

Мамандар экран алдында ұзақ отыру баланың кеш ұйықтауына, таңертең шаршап оянуына және сабақ кезінде зейінін шоғырландыруының қиындауына ықпал ететінін ескертеді, – деп хабарлайды Aikyn.kz сайты.

Америкалық педиатрия академиясының мәліметінше, ұйықтар алдында телефон қарау баланың миын сергек күйде ұстап, ұйқыға кетуін қиындатуы мүмкін. Әсіресе әлеуметтік желідегі қысқа видеолар, компьютерлік ойындар мен эмоциялық әсері күшті контент баланың тынышталуына кедергі келтіреді. Бұған экраннан тарайтын жарықтың әсері де қосылады. Ол ағзадағы ұйқыны реттейтін мелатонин гормонының бөлінуіне ықпал етіп, адамның ұйқысы келетін уақытты кешіктіруі мүмкін.

Мамандардың айтуынша, мәселе телефонды қанша уақыт пайдалануда ғана емес, оны тәуліктің қай мезгілінде қолдануда да жатыр. Мәселен, бала ұйықтар алдында бірнеше видео көремін деп, жоспарлаған уақытынан әлдеқайда кеш жатуы мүмкін. Ал түнде келетін хабарламалар мен қоңыраулар ұйқыны бөліп, толыққанды тынығуға кедергі жасайды. Ұйқының тұрақты бұзылуы баланың есте сақтау қабілетіне, көңіл күйіне және оқу үлгеріміне әсер етуі ықтимал.

Америкалық педиатрия академиясы 6-12 жастағы балаларға тәулігіне 9–12 сағат, ал 13-18 жастағы жасөспірімдерге 8-10 сағат ұйықтауды ұсынады. Ұйқының жеткіліксіздігі күндізгі шаршауға, ашушаңдыққа және зейіннің төмендеуіне әкелуі мүмкін.

Сондықтан мамандар балаларға ұйықтардан кемінде бір сағат бұрын телефон, планшет және теледидарды пайдалануды тоқтатуға кеңес береді. Сондай-ақ түнде электронды құрылғыларды баланың жатын бөлмесінен тыс жерде қалдырған жөн. Ең бастысы, ұйықтау және ояну уақытын тұрақты ұстану қажет.

Дәрігерлердің түсіндіруінше, телефонның өзі баланың денсаулығына міндетті түрде зиян келтіреді деуге болмайды. Оның әсері құрылғыны пайдалану уақытына, көретін контентіне және баланың күнделікті ұйқы тәртібіне байланысты.