СҚО да биыл құрылыс саласында 30 млн теңгеге жуық айыппұл салынды

СҚО мемлекеттік сәулет-құрылыс бақылау және лицензиялау басқармасының мәліметінше, ай сайын салынып жатқан нысандарға мониторинг жүргізіледі.

Мониторинг қорытындысы бойынша субъектіге ескертулерді жою туралы ұсынымдары бар мониторинг актісі беріледі. Бұл көбінесе профилактикалық сипатқа ие, оның қорытындысы бойынша шара қабылдау мүмкін емес.

Ал тексерулер негізінен жеке және заңды тұлғалардың өтініштері бойынша жүзеге асырылады. Жиі кездесетін заңбұзушылықтар белгілі бір құжаттаманың болмауымен байланысты.

- Биыл 21 тексеріс өткіздік. Үшеуі бойынша нұсқама берілді. Сәулет, қала құрылысы және құрылыс қызметі саласындағы әкімшілік заңбұзушылықтар бойынша жалпы сомасы 30 млн теңгеге жуық айыппұл салынды. Бүгінде тексеріс жүргізу барысында бірқатар қиындық туындап отыр. Себебі кейбір тексерілетін ұйымдар мемлекеттік қызметкерлермен кездесуден қашып, тексеріс туралы актімен және басқа ресми құжаттармен танысудан бас тартады, - дейді СҚО мемлекеттік сәулет-құрылыс бақылау және лицензиялау басқармасы басшысының міндетін атқарушы Азамат Исахметов.

Маманның айтуынша, тағы бір мәселе - тексерулер қорытындысы бойынша нұсқама берілгеннен кейін жауап беруші бұл нұсқамаларға ҚР Әкімшілік рәсімдік-процестік кодексінің нормаларын алға тартып, шағымданады. Салдарынан нұсқаманың қолданылуы тоқтатыла тұрады.

- Қазіргі уақытта бақылаушы органдардың өкілеттіктері шектеліп, кәсіпкерлерді қорғау тетіктері күшейген. Сондықтан кейбір құрылыс компаниялары осыны пайдаланып, заң талаптарын бұзып жатады, - дейді Азамат Исахметов.

Бұған дейін Мәжіліс жаңа Құрылыс кодексінің жобасын бірінші оқылымда мақұлдағанын жазған едік.