СҚО да кәсіпкер учаскесінен канал өткізген әкімдіктен өтемақы ала алмай жүр

Мәселе Кәсіпкерлер палатасы жанындағы Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңесте қаралды.

Оқиға су тасқынына байланысты төтенше жағдай кезінде болған. Осы жылдың ақпан айында аудан әкімдігі «Қызылжар2020» ЖШС-нің үш жер телімінің бірін уақытша алып, Есіл өзенінен канал қазған. Бірақ жұмыс барысында бір жер теліммен шектелмей, оған іргелес жатқан учаскені де қамтыған.

Кәсіпкерлер палатасы бөлімінің басшысы Айдос Кеңбейіловтың айтуынша, салдарынан жердің құнарлы қабаты алынып, жер телімінің тұтастығы бұзылған. Енді жерді қалпына келтіру үшін кәсіпкер шығынға батпақ. Сонымен қатар, канал салу барысында серіктестіктің баздары мен ғимараттар орналасқан үшінші жер теліміне баратын жол жабылып қалған.

Оның пікірінше, канал құрылысына бөлінген 125 миллион теңге қаражатқа өткел салуға да жетер еді.

Кәсіпкер Елдар Базаров ұсынған дәлелдерге қарамастан, аудан әкімдігінің өкілдері заңбұзушылықты жоққа шығарып, шығынды өтеуден бас тартып отыр.

- Әкімдік осы жылдың соңына дейін бір үлкен жер телімін уақытша алған, оған еш қарсылығым жоқ. Бірақ мәселе 417-ші жерге қатысты. Әкімдік ресми түрде бұл жерде ешқандай жұмыс жүргізілмегенін айтады. Сонда канал қалайша бір жағадан екіншісіне өтті? Әкімдік канал үстінен көпір салынады деп уәде берген, бірақ жаз өтті, күз келді, ал нәтиже жоқ, – дейді «Қызылжар2020» ЖШС директоры Елдар Базаров.

Қызылжар ауданы жер қатынастары бөлімінің басшысы Руслан Аспанов компанияға орнына басқа жер беруді немесе конфигурациясын өзгертуді ұсынған. Бірақ кәсіпкер өз жеріне қолжетімділікті қалпына келтіруді талап етіп отыр.

Экономикалық тергеу департаменті басшысының орынбасары Максим Пахно бұл мәселенің күрделі екенін мойындады.

Оның айтуынша, төтенше жағдай кезінде қабылданған шешімдердің салдары қазір шыға бастаған. Кәсіпкердің шағымы бойынша енді тексеріс жүргізілмек.

Бұған дейін СҚО-да суық ауа райы мен дизель сапасы егін орағын тежеп тұрғанын жазған едік.