СҚО да пышақ кезенген ер адам полиция көлігінің ішінде учаскелік инспекторға шабуыл жасады

Солтүстік Қазақстан облысында мас ер адам полиция көлігінің ішінде учаскелік инспекторға пышақпен шабуыл жасады. Төтенше оқиға шілденің аяғында Қызылжар ауданында, Лебедки мен Налобино ауылдары арасында болған, деп хабарлайды Tengrinews.kz тілшісі.

Полицей қоғамдық орында мас күйінде болған құқық бұзушыны медициналық куәландыруға апара жатқан. Жолда мас ер адам пышақ шығарып, полицейге тап беріп, оны жарақаттаған. Абырой болғанда, учаскелік инспектор дер кезінде әрекет етіп үлгерді: құқық бұзушының қолынан пышақты қағып жіберіп, көлікті тоқтатып, ықтимал жол апатының алдын алды.

Облыстық полиция департаментінің баспасөз қызметі Tengrinews.kz-ке аталған факті бойынша қылмыстық іс қозғалғанын хабарлады.

"Учаскелік полиция инспекторы қызметтік көлікте шабуыл жасаған мас құқық бұзушыны полиция бөліміне жеткізу кезінде кесілген жарақат алды. Осы дерек бойынша қылмыстық іс қозғалды. Күдікті ұсталып, уақытша ұстау изоляторына қамалды", - деп хабарлады СҚО ПД баспасөз қызметі.

Қылмыстық іс ҚР Қылмыстық кодексінің 380-бабы 5-бөлігі "Билік өкіліне қатысты қорқыту немесе күш көрсету әрекеттері" бойынша қозғалды. Қызметтік міндеттерін атқару кезінде полицейдің өміріне немесе денсаулығына қауіпті күш қолданғаны үшін жеті жылдан 12 жылға дейін бас бостандығынан айыру жазасы қарастырылған.

Ведомство мәліметінше, қазіргі уақытта қажетті медициналық көмек алып, денсаулығын түзеген учаскелік инспектор қызметіне оралды.

Бұған дейін Солтүстік Қазақстан облысында мас топ полицейлермен төбелескені, ер адамдардың бірі қызметкерлерге пышақпен тап бергені туралы хабарланған еді. Жанжалдың видеосы әлеуметтік желіде тараған болатын.

Google News арқылы жаңалықтарымызды қадағалаңыз