Стоматологиядағы қателік: Астанадағы үш жасар қыздың өліміне қатысты іс сотта қаралуда

Астанада жеке стоматологиялық клиникада үш жастағы қыз қайғылы жағдайда көз жұмды. Dent-Park емханасында дәрігерлер бүлдіршінді тісі ауырғандықтан жалпы седацияға ұйықтатып, бірден 18 тісін емдеуге кіріскен. Алайда ұзақ анестезиядан кейін бала есін жимаған, деп хабарлайды Azattyq Ryhy.

Қайғылы оқиғаға байланысты қазір қылмыстық іс сотта қаралып жатыр. Жәбірленуші жақтың айтуынша, емдеу кезінде бірқатар медициналық стандарттар сақталмаған. Қыздың әкесі Талғат Құмаров 30 қазан 2024 жылы клиникаға жүгінгенін айтты. Ол қызын Севоран препараты арқылы наркозбен қабылдауға тапсырған.

Бұған дейін де дәл осындай ұзақ процедура болған. Әке айтуынша, алдыңғы ем кезінде де бала үш жарым сағаттан ұзақ наркозда болып, есін кеш жиған. Сол кезде күмән туындағанымен, дәрігерлер тыныштандырып, бәрі дұрыс боларына сендірген.

«Мамандар бірден 20 тістің 18-ін емдеуге шешім қабылдаған. Седация 09:10-да басталды. 14:00-де әйелім хабарласып, баланың оянбай жатқанын айтты. Жедел жәрдем келді, реанимация 40-45 минутқа созылды. Бірақ қызым оянбады. Жүрегі тоқтап, миы ісініп кеткен», — деді Талғат Құмаров.

Фармацевтикалық бақылау жүргізілген тексеріс клиникада бірқатар ереже бұзылғанын анықтаған. Құмаровтың айтуынша, алғашқы көмек көрсету кезінде заңсыздықтар болған. Клиника директоры Надежда Хон анестезиологтың сол күні қызметтен кеткенін растады, алайда процедураға қатысқан стоматолог әлі де жұмыс істеп жүр.

«Біз анестезия маманын жұмыстан шығардық. Енді сараптама қорытындысын күтіп отырмыз», – деді Хон.

Сот отырысына қатысқан анестезиолог Жұмағалиева тілшілердің сұрақтарына жауап беруден бас тартты.

Жәбірленуші тараптың адвокаты Руслан Айтжанов сапаны бақылау қызметі мен сот сараптамасы екі дәрігердің де кінәсін растайтынын айтты. Соған қарамастан тергеу тек анестезиологқа қатысты жүргізілген.

«18 тісті бірден емдегісі келген стоматолог жауапқа тартылмаған. Тергеу мен прокуратураның олқылығы бар», – деді адвокат.

Тергеп-тексеру нәтижесінде анықталған мән-жайлар мынадай:

анестезиолог 2019 жылдан бері біліктілігін қайта растамаған, ал балалармен жұмыс істеу үшін 7 жылдық тәжірибесі болмаған;клиникада жарамдылық мерзімі өткен және сертификаты жоқ препараттар сақталған;баланы ұзақ уақыт седацияда ұстау стандарттары бұзылған.

Марқұм баланың ата-анасы мен адвокаттары жеке стоматологиялық клиникаларда ұзақ анестезияға жатқызу тәжірибесін қайта қарап, кішкентай балалар үшін бірден көп тіс емдеуден бас тарту қажеттігін айтады. Олар бұл оқиғаға қатысы бар барлық медицина мамандарының жауапкершілікке тартылуын талап етеді.

Анестезиологтың адвокаты сотқа келе алмағандықтан, процесс кейінге қалдырылды.

Бүгін, 14:39