Талғарда қылмыстың басым бөлігі ішімдік салдарынан болып жатыр полиция

— Талғар ауданында жүргізілген талдау нәтижесінде көше қылмыстарының 90%-ы алкогольдік масаң күйде жасалатыны анықталды, — деп мәлімдеді Алматы облысы полиция департаментінің баспасөз қызметі.

Құқық бұзудың алдын алу және түнгі уақытта қоғамдық қауіпсіздікті қамтамасыз ету мақсатында спирттік ішімдіктердің сатылуына бақылау күшейтілген. Полиция жасақтары тұрғындардың жаппай демалатын және серуендейтін орындарына жақындатылып отыр.

Полицияның мәліметінше, жүйелі шаралардың арқасында көшедегі қылмыс саны азайған.

Ал профилактикалық іс-шаралар барысында 12 арнайы талап пен 37 қорғану ұйғарымы шығарылып, отбасылық-тұрмыстық қатынастар аясындағы құқық бұзудың алдын алу жұмыстары жүргізілген. Сондай-ақ алкоголь өнімдерін сату ережелерін бұзған 12 сауда нүктесіне әкімшілік шара қолданылған.

Еске салайық, Талғарда 2025 жылғы 6 қыркүйекте жантүршігерлік қылмыс болды: бейтаныс адам ер кісіні атып, кішкентай қызды алып қашып кеткен еді.

Тергеу мәліметінше, күдікті мен кішкентай қыздың анасы бұрын жақын қарым-қатынаста болған. Араларында жанжал шығып, ер адам әйелдің ағасын мылтықпен атып тастаған. Ол алған жарақатынан сол жерде көз жұмған.

Кейінірек бұл оқиға бойынша полиция қызметкерлерінің әрекетсіздігіне байланысты іс қозғалды.