Талғардағы қанды оқиға: полицейлердің әрекетсіздігіне қатысты ісі қандай сатыда

Алматы облысының прокуратурасы Талғар аудандық полиция басқармасы қызметкерлеріне қатысты Қылмыстық кодекстің 370-бабының 4-бөлігі («Лауазымды тұлғалардың әрекетсіздігі») бойынша қылмыстық іс қозғады.
Оларға кәмелетке толмаған қызды ұрлап әкетіп, ер адамды өлтірген күдіктіні уақтылы ұстау үшін шараларды қабылдамаған деген айып тағылып отыр. Қайғылы оқиға Талғар ауданы Қызылқайрат ауылында болған еді.

Kazinform агенттігі тергеудің қандай сатыда екенін білу үшін ресми сауал жолдады. Облыс прокурорының орынбасары Нұржан Серікұлының жауабына сәйкес, тергеуді қазіргі уақытта Алматы облысы прокуратурасының сотқа дейінгі тергеу басқармасының ведомствоаралық жедел-тергеу тобы жүргізіп жатыр.

— Қазіргі таңда іс бойынша қажетті тергеу амалдары мен сараптамалық зерттеулердің кешені жүргізіліп жатыр. Істің барлық мән-жайлары жан-жақты, толық әрі объективті түрде анықталуы қамтамасыз етіліп жатыр, — деді ол.

Қылмыстық кодекстің аталған бабы бойынша 7 жылға дейін бостандығын шектеу немесе бас бостандығынан айыру түріндегі жаза, сондай-ақ мүлікті тәркілеу және өмір бойына белгілі бір лауазымдарды атқару не белгілі бір қызметпен айналысу құқығынан айыру жазасы көзделген.

Сонымен қатар прокуратура Қазақстан Республикасы Конституциясының 77-бабы 3-тармағының 1-тармақшасына және Қылмыстық-процестік кодекстің 19-бабының 1-бөлігіне сәйкес, әр адам сот үкімі заңды күшіне енгенге дейін кінәсіз болып есептелетінін еске салды.

Еске салайық, Талғарда 2025 жылғы 6 қыркүйекте жантүршігерлік қылмыс болды: бейтаныс адам ер кісіні атып, кішкентай қызды алып қашып кеткен еді.

Тергеу мәліметінше, күдікті мен кішкентай қыздың анасы бұрын жақын қарым-қатынаста болған. Араларында жанжал шығып, ер адам әйелдің ағасын мылтықпен атып тастаған. Ол алған жарақатынан сол жерде көз жұмған.

Кейін полицияның арнайы жасағы қызды босатып, күдіктіні ұстады.

Ал Талғардағы оқиға кезінде жарақат алған кішкентай қызға ота жасалды.

Өткен аптада Қызылқайрат ауылында болған ер адамды өлтіру және кәмелетке толмаған қызды ұрлау ісі бойынша сотқа дейінгі тергеу аяқталды.