Танымал тұлғалар есірткіге қарсы күрес акциясына атсалысты

Бүгінде оңай олжаға кенелуді көздейтін жастар есірткі тасымалдап, әлеуметтік желі арқылы саудалап жүр. Әрекеті әшкере болғандар қылмыстық жауапкершіліктен құтылмайды. Себебі заң бойынша есірткі саудасына қатысқандар 14 жастан бастап жаза арқалайды. Жастар балғын шақтан қатаң түрме тезіне түсіп, болашағына балта шаппас үшін ел аумағында түсіндіру жұмыстары белсенді жүргізіліп жатыр, деп жазады Egemen.kz.

Сәкен Сейфуллин атындағы Қазақ агротехникалық зерттеу университетінде өткен кезекті «Астана – есірткісіз қала» акциясына құқық қорғау органдарының қызметкерлерімен қатар танымал спортшылар, медиа тұлғалар мен дәрігерлер де қатысты.

«Заң және тәртіп» қағидаты аясында  ұйымдастырылған акцияда кәсіпқой боксшы Ангелина Лукас, ауыр атлетика шебері Илья Ильин, ММА жауынгері Василий Тахтай, киокушинкай және каратэден әлем чемпионы Нұрсұлтан Әлиақбаров, блогер Әлібек Ермағамбетов тақырыпқа қатысты түйгендерін ортаға салды. Қонақтардың есірткі тұтыну мен оның саудасына үлес қосудың салдары туралы келелі көзқарастары жиналған жастардың санасын серпілтіп, қатеге бой алдырмауға үндеді.

Өз кезегінде Илья Ильин теріс жолға түспеудің тиімді жолы өзіңді дамыту, іздену екенін атап өтті.

«Мен жастарды білім алуға шақырамын. Өзін дамытуға ұмтылған ұрпақ, алдында мақсаты бар азамат ешқашан қоғамға зиян келтіретін жолды таңдамайды. Есірткі тұтыну мен саудалауға аяқ баспайды. Бүгін мен жүріп өткен жолым арқылы қандай жағдайда да өзін жоғалтпаудың сырымен бөлістім. Осы есірткіге қарсы жүргізген үгіт-насихатымыз болашақта жемісін беретініне сенемін», деді Илья Ильин.

ІІМ өкілдері осы жылдың мамырына дейін елімізде 1 445 есірткіге байланысты қылмыстық іс тіркеліп, оның 276-сы Астанаға тиесілі екенін жеткізді. Сондықтан білім мен жұмыс іздеп бас қалаға ағылатын жастармен жиі жүздесіп, есірткінің денсаулыққа тигізетін зияны мен заң шеңберіндегі жазасын жете түсіндіру – әрқашан өзекті.

«Бүгін саламатты қоғамның негізіне баланатын жастар алдында арнайы жедел әрекет ету жасағының (СОБР) жауынгерлері ел арасында «закладчик» аталып кеткендердің ізін кесу, есірткі жасырылған орындарды іздеп, табу бағытында жасалатын қырағы қадамдарын нақты көрсетті. Осындай жүйелі әрекеттердің арқасында қылмыс бүгін немесе ертең ашылатынын жастар аңдамай жатады. Сондықтан осы іске барудың салдарын көз алдарында көрсеттік. Алдымен өзін, ата-анасын ойлайтын саналы жас есірткіге әуестенбеуі керек», деп түсіндірді полиция подполковнигі, есірткі қылмысына қарсы күрес басқармасының қызметкері Дамир Байбазаров.

Ғасыр дертіне баланған есірткінің қауіп-қатерін түсінетін жастар да аз емес. Олар есірткіге қарсы күрес шараларына шама-шарқынша қолдау көрсетіп келеді. Мәселен, «Астана жастары» ұйымының белсенділері ІІМ мамандарымен бірлесіп, 2 500-ден астам есірткі жарнамасы салынған граффитидің жойылуына септескен.

Акция аясында қалалық психикалық денсаулық орталығының дәрігер-наркологтары Р.Молдахметова мен Н.Омарова есірткі тұтынудың денсаулыққа, адам өміріне келтіретін кері салдарын жете түсіндірді.

Ауқымды жиын соңында полиция подполковнигі Д.Байбазаров студенттер арасында есірткінің заңсыз айналымына қарсы күрес ісіне қатысты интерактивті сауалнама жүргізді. Студенттер аталған сауалнама арқылы білгенін шегелеп, заңнамаға қатысты маңызды мәліметтерге қанықты.