Таяу Шығыстағы шиеленіс: Иран жаңа ғана Израиль аумағын зымырандармен атқылады

Израиль әскері Ираннан ел аумағына жаңа зымыран шабуылдары жасалғанын айтты, – деп хабарлайды Aikyn.kz сайты.

Бұл әрекет Тель‑Авив пен Вашингтонның Иран объектілеріне бірлескен соққысынан кейінгі шиеленістің жалғасуы аясында болды.

Израиль әскери ведомствосының мәліметінше, аз уақыт бұрын Иран аумағынан Израильге бағытталған зымырандар ұшырылғаны тіркелді.

Қауіпті болдырмау үшін әуе қорғаныс жүйелері қолданылған. Сонымен қатар тиісті аймақ тұрғындарына ұялы телефондарға ескерту хабарламалары жіберіліп, сақтық шараларын сақтау ұсынылған. Қауіп дабылы берілген жағдайда азаматтар дереу бункерлерге немесе арнайы қорғаныс орындарына кіріп, арнайы бұйрық шыққанға дейін сол жерде қалуға  тиіс.

АҚШ пен Израильдің Иранға соққысы

28 ақпанда Израиль мен АҚШ Иран аумағына әскери соққы жасады. Бұл кезде Тегеран мен Вашингтон арасында келіссөздер жүріп жатқан еді.

Оған жауап ретінде Иран Израильдегі нысандарға және аймақтағы бірнеше елдегі, оның ішінде Катар, БАӘ, Бахрейндегі АҚШ әскери базаларына шабуылдар жүргізді.

Иран тарапынан хабарланғандай, АҚШ пен Израильдің соққылары салдарынан Иранның Жоғарғы жетекшісі Әли Хаменеи және бірнеше жоғары лауазымды тұлға қаза тапқан.

Иран Қызыл Жарты Ай қоғамы хабарлағандай, АҚШ пен Израильдің шабуылдары нәтижесінде 787 адам қаза тапқан.