Таяу Шығыстағы жағдайға байланысты Алматы мен Астанадан ұшып шыққан ұшақтар кері оралады

Air Astana әуе компаниясының мәліметінше, KC263 Алматы — Медина, KC897 Алматы — Дубай, KC653 Алматы — Доха, KC205 және KC207 Астана — Дубай рейстері бастапқы әуежайларына қайтты. Ал KC899 Алматы — Дубай рейсі Делиге бағытталды. FlyArystan-ның FS7617 Ақтау — Дубай рейсі қосалқы әуеайлаққа қонды.

28 ақпанда Таяу Шығысқа қалған барлық рейс тоқтатылды.

Air Astana компаниялар тобы жағдайды мұқият бақылап, жолаушыларды тасымалдау мәселелерін шешіп жатқанын мәлімдеді. Жолаушылар рейстердің мәртебесін тексергені жөн, себебі межелі әуежайларға ұшу және келу уақытында өзгерістер болуы мүмкін.

— Сатып алу орны бойынша Жидда, Медина және Дубайға билеттерді 6 наурызға дейін тегін қайта брондауға немесе қайтаруға рұқсат етіледі, — делінген хабарламада.

Еске салайық, бұған дейін Израиль Иранға соққы жасағанын хабарлағанбыз.

Иран мен Израиль өздерінің әуе кеңістігін барлық ұшақ қозғалысы үшін жауып тастады, сол себепті ұшақтар Иран аумағынан шығуға немесе айналып өтуге мәжбүр болып жатыр.

Дональд Трамп АҚШ-тың Иранға қарсы «көп масштабты әскери операция» бастағанын растады.