Таза Маңғыстау экочелленджінің ең белсенді қатысушысына ₸1 млн беріледі

Маңғыстау өңірінде 45 күндік челлендж өтіп жатыр, деп хабарлайды 24KZ. Ауқымды жобаны үкіметтік емес ұйымның үйлестіруімен волонтерлер жүзеге асырып отыр. Игі бастама қоғамда экологиялық мәдениетті қалыптастырып, экобелсенділер мен еріктілер қозғалысын жандандыруды көздейді. Челленджге білек түре атсалысқан азаматтарға қаржылай сыйақы беріледі.

Экочеллендж 13 қазанда басталды. Игі бастамаға кез келген азамат, еңбек ұжымы қатыса алады. Талап баршаға ортақ. 45 күн бойы тазалық немесе табиғатты қорғауға бағытталған шараларға атсалысу керек. Сосын #ТазаҚазақстан және #ТазаМаңғыстау хэштегімен әлеуметтік желіге жариялануы тиіс. Ең белсенді танылғандардың есімін арнайы комиссия жариялайды. Жалпы жүлде қоры 7 млн теңге.

Кирилл Осин, экочелленджді үйлестіруші:

- Соның ішінде жеке қатысушыларға 2 млн теңге, еңбек ұжымдарына 5 млн теңге сыйақы қарастырылған. Әлеуметтік желіде @tazamangystau парақшасы ашылды. Оған челленджге қатысушылардың әр жұмысы «EcoИгіІстер» күнтізбесіне онлайн тіркеледі. Яғни олардың әр күн сайын тазалыққа атсалысуы, көшелерді абаттандыруға қосқан еңбегі үшін ұпай қосылады.

Әлеуметтік әрі экологиялық жоба «Таза Қазақстан» жалпыұлттық акциясы аясында өтіп жатыр. Қазірдің өзінде 600-ден астам адам тіркелген. Қатысушылардың арасында түрлі мекеме қызметкерлерінен құралған 33 команда бар. Ал еріктілердің қатары күн санап көбейіп келеді. Жеңіс Енболатұлы волонтер. Ол күнделікті қоғамдық көлікке мінген тұрғындарды тазалыққа шақырып, қоқысты арнайы орынға тастауға үндейді.

Жеңіс Енболатұлы, волонтер:

- Бұл қарапайым халыққа экологиялық мәдениетті қалыптастыру. Яғни қоқыс тастамау. Ағаштарды отырғызу, сонымен қатар қуат пен суды үнемдеу деген сияқты бағытта өткізіледі. Қазіргі кезде бізде 45 күндік «Таза Маңғыстау» деген челлендж өтіп жатыр. Соған қосылып, күнделікті әдетке айналдыруға тырысу.

Белсенді азаматтардың тұрмыстық қалдықтарды қайта өңдеу, ауыз су, ток және жылуды үнемдеуге шақырған бастамасы да ескерусіз қалмайды. Ең бастысы, сол туралы ғаламторда көпшілікке түсінікті әрі қызықты жарияланым жасалса болғаны. Челлендж жеңімпаздары баллдық жүйемен анықталып, желтоқсанда марапатталады.

«Таза Маңғыстау» челленджінің аяқталуына аз ғана уақыт қалды. Оған атсалысуға ниетті азаматтардың жасына шектеу жоқ. Ең белсенді тұрғынға 1 млн теңге сыйақы беріледі. Қоғамды тазалық сақтауға үндеген еңбек ұжымына 2,5 млн теңге табысталады. Қалған қатысушыларды да қаржылай сыйақы күтіп тұр.

Авторлары: Талғат Исламұлы, Ренат Досалиев, Саламат Бекбаев