Tesla Құтырған Макс режимін неге қосты?

BGR сайтының хабарламасына сүйенген Aikyn.kz жүргізушісі жоқ көлікке жол ережесін бұзатын режимнің неге қойылғанын түсіндіреді.

Tesla FSD v14.1.2 жаңартуының соңғы ескертпелерінде автокомпания былай деп жазады: «Жаңа MAD MAX жылдамдық профилі енгізілді. О HURRY режимімен салыстырғанда жоғары жылдамдық пен жиірек жолақ ауыстырумен ерекшеленеді».

Бұл Tesla тарихында Mad Max режимінің алғаш қосылуы емес. Ол Tesla Autopilot жүйесінің бастапқы нұсқаларында, яғни қазіргі Full Self-Driving (FSD) жүйесінің ізашары кезінде енгізілген болатын.

Жаңартудың ерекше тұсы – Tesla-ны оны қиын кезеңде енгізуі. Компанияға қарсы қозғалған бірқатар сот істері мен реттеуші органдардың қысымына қарамастан, көлік компаниясы осындай тәуекелге барып отыр.

Соңғы айларда Tesla көліктерінің қарсы жолаққа шығып кетуі, бағдаршамның қызыл түсіне өтіп кетуі сияқты ережені бұзу жағдайлары жиілеген. Бұған қоса, бұрынғы бірнеше инциденттер де бар. Соның бірі, Tesla көлігі журналисті қағып кете жаздаған жағдай. Бұндай даулы жағдайда жаңа режимнің қосылуы батыл шешім деуге болады.

Tesla бірнеше жылдан бері өзінің автономды жүргізу технологиясын басқа өндірушілерге лицензиялауды талқылап жүр. Осындай контексте компанияның дәл қазір батыл әрі қауіпті қадамға баруы түсініксіз.

«Mad Max» режимін қайта енгізу ақылға да, логикаға да сай келмейді. Әсіресе соңғы жылдары Tesla бренді реттеуші органдар мен қоғам тарапынан сынға ұшырап жүргенін ескерсек, бұл мүлдем түсініксіз стратегия.

Соңғы айларда Tesla көліктерінің «Тоқта» деген жол белгілерін елемеуі, жылдамдықты сағатына 24 км асыруы туралы мәліметтер пайда бола бастады.

YouTube блогері Сойер Мерритт жаңа режимді сынап көріп, Tesla көлігінің трассада жылдамдықты 32 км/сағатқа үнемі асырып жүргенін видеода жазбада көрсеткен.

Қазіргі таңда Tesla бұл режимді қайтадан өшіреді ме, жоқ па – белгісіз. Дегенмен егер сіз Tesla көлігін басқарып, Mad Max режимін қосқыңыз келсе, аса сақ болуыңыз керек. FSD (толық автономды жүргізу) жүйесін қолдану нұсқауларын қатаң сақтағаныңыз дұрыс.Tesla-ның даулы кезеңде Құтырған Макс (Mad Max) режимін неге қайта енгізді?

Tesla көбіне ақпараттық шу мен қоғам назарын аудару арқылы брендтің көрінуін арттырады. «Құтырған Макс» – жарнамаға ақша төлемей-ақ, ақпараттық күн тәртібінде қалудың тәсілі. Илон Маск мұны жиі пайдаланады. Даулы немесе күтпеген шешім қабылдау арқылы Tesla-ны «инновациялық, батыл» бренд ретінде көрсеткісі келеді.

Екінші себеп. Қазір автономды жүргізу нарығында (FSD, Autopilot) үлкен жарыс жүріп жатыр. Google-дың Waymo, GM Cruise және қытайлық Baidu сияқты компаниялар белсенді дамуда.

Tesla «Mad Max» сияқты режимдерді қайта қосу арқылы өз алгоритмдерінің агрессивті де, икемді екенін жарнамалайды. Бұл компанияның «біз әлі көшбасшымыз» деген ішкі және сыртқы сигналы болуы мүмкін.

Үшінші себеп. «Құтырған Макс» – жоғары тәуекелді, бірақ деректер тұрғысынан пайдалы режим. Tesla пайдаланушының нақты жолдағы әрекеттерін бақылай отырып, FSD жүйесін жетілдіру үшін үлкен көлемде жүріс деректерін жинайды. Бұл режимді енгізу – машиналық оқыту үшін агрессивті сценарийлерді жинаудың тәсілі.

Төртінші себеп. Илон Маск реттеушілер мен қоғамдық қысымға әрқашан агрессивті әрекет етеді. Ол «инновация ережелерден алда жүруі тиіс» деген қағиданы ұстанады.

«Mad Max» режимінің қайта оралуы – осы философияның көрінісі: «Иә, бұл қауіпті, бірақ біз алға жүруіміз керек».

Бұл шешім Масктің технологиялық еркіндік пен батылдықты бюрократиядан жоғары қоятынын көрсетеді.

Біздің ойымызша, дәл қазір Tesla-ға «Mad Max» режимі технологиялық тест, маркетингтік трюк және идеологиялық мәлімдеме ретінде қажет.

Бірақ мұндай қадам қоғамдық сенім мен заңдық тәуекел тұрғысынан қауіпті. Егер бір ғана апат болса, Tesla-ның автономды жүргізу жүйесіне қатысты сын тағы да күшейеді.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.