TikTok қожайыны Disney ден қорқып, видео жасайтын ЖИ құралдарын шектейтін болды

Америкалық Disney мен қытайлық ByteDance арасындағы шиеленістің себебін Reuters хабарламасы негізінде Aikyn.kz түсіндіреді.

Қытайлық технологиялық ByteDance компаниясы дүйсенбі күні (16 ақпан) Disney және басқа америкалық студиялар тарапынан сотқа беру қаупі төнгеннен кейін, жасанды интеллект негізіндегі Seedance 2.0 видео генераторында зияткерлік меншікті рұқсатсыз қолдануды болдырмайтынын мәлімдеді.

Өткен аптада ғана іске қосылған Seedance 2.0 арқылы жасалған видеолар Қытайда кеңінен тарап, вирустық роликтерге айналған. Соның ішінде Том Круз бен Брэд Питтің төбелескені көрсетілген видео да бар. Мамандар бұл ЖИ моделін DeepSeek-пен салыстырып, оның небәрі бірнеше нұсқау арқылы кинематографиялық сюжет құра алатын қабілетін жоғары бағалап жатыр.

Жағдайдан хабардар дереккөз жексенбі күні кешке Reuters агенттігіне Disney компаниясы ByteDance-ке заңсыз әрекеттерді тоқтатуды талап еткен хат жібергенін айтты. Онда қытайлық фирманы Disney кейіпкерлерін Seedance 2.0 моделін оқытуға және жұмысын қамтамасыз етуге рұқсатсыз пайдаланған деп айыпталған.

Дереккөздің айтуынша, Disney ByteDance Seedance жүйесіне «Жұлдызды соғыстар» және Marvel сияқты франшизалардан авторлық құқықпен қорғалған кейіпкерлердің пираттық кітапханасын алдын ала енгізіп, оларды «жалпыға қолжетімді суреттер» ретінде көрсеткенін мәлімдеген.

«Біз қолданыстағы қорғаныс шараларын күшейту үшін қадамдар жасап жатырмыз. Мақсатымыз – пайдаланушылар тарапынан зияткерлік меншік пен бейнелердің рұқсатсыз қолданылуын болдырмау», – делінген ByteDance мәлімдемесінде.

Paramount Skydance компаниясы да ByteDance-ке заңсыз әрекеттерді тоқтатуды талап еткен хат жолдап, қытайлық фирманы өз зияткерлік меншігін «өте өрескел бұзды» деп айыптаған. Желтоқсан айында Disney OpenAI-мен лицензиялық келісімге келіп, стартапқа өздерінің «Жұлдызды соғыстар», Pixar және Marvel франшизаларындағы кейіпкерлерді Sora видео генераторында қолдануға рұқсат берген.